Иммиграциялық визалар тоқтады, Мексика арқылы заңсыз миграция күшейе ме?

АҚШ Мемлекеттік департаменті 21 қаңтардан бастап Қазақстанды қоса алғанда 75 мемлекет азаматтарына иммиграциялық визаларды уақытша беруді тоқтатқан болатын. Сарапшы бұл жайт АҚШ-қа барудың баламалы жолдарына қызығушылық тудыруы мүмкін екенін айтады.

«Airvisa agency 398» визалық орталығының директоры, сарапшы Жанель Калхабаева егжей-тегжейін түсіндірді:

– Қазақстан азаматтарына иммиграциялық визалардың уақытша тоқтатылуы АҚШ-қа барудың балама жолдарына, әсіресе туристік визаға қызығушылықты арттыруы мүмкін. Бірақ мұндай кезде консулдықтар өтініш берушіні өте мұқият тексереді, себебі иммиграциялық тәуекел жоғары деп бағаланады, – дейді ол.

Сонымен бірге сарапшы үшінші елдер арқылы кіру немесе Мексика бағытын пайдалану – заңдық және миграциялық тұрғыдан өте қауіпті екенін ескертеді.

– Туристік виза иммиграциялық визаның орнын баса алмайды, ал оны дұрыс қолданбау көбіне виза беруден бас тартуға немесе АҚШ-қа кіруге ұзақ мерзімді тыйым салуға әкеледі, – дейді Жанель Калхабаева.

Маман иммиграциялық визалар беруді уақытша тоқтату АҚШ-тың одан толыққанды бас тартқанын білдірмейтінін айтты. Сарапшы сөзінше, өтініштер әлі де қабылданады, сұхбаттар жүргізіле береді, бірақ үміткерлерді тексеру мен бағалау тәртібі қайта қаралғанша визалар іс жүзінде берілмейді.

– Бұл шара АҚШ-қа баратын мигранттардың қаржылық дербестігін бағалауға бағытталған ережелерге негізделген. Ал бейиммиграциялық визалар (мысалы, туристік виза) әзірге қолжетімді. Дегенмен консулдық шешімдерде қосымша тексерулер мен қатаң бақылаудың күшеюін күту керек, – деді маман.

Кәмила Дүйсен