Индонезияда Сұлтан Сәрсемалиевтен қандай құжаттар тәркіленді?

Тәркіленген заттардың ішінде ұялы телефондар мен жеке куәліктер де бар. Алдын ала ақпарат бойынша бұл заттардың бір бөлігі Жангелдин ауылында жоғалып кеткен отбасы мүшелеріне тиесілі болуы мүмкін.

Қазір тәркіленген құжаттар мен карталардың кімге тиесілі екені және олардың Мейрамгүл мен Наурызға қатысы бар ма, жоқ па деген сұрақтарға жауап іздестіріліп жатыр.

Естеріңізге сала кетейік, отбасы жоғалып кеткеннен кейін Наурыз мессенджерлер арқылы хабарласып тұрған. Хат алмасу кезінде ол анасының шұғыл емделуі қажет екенін айтып, малды сатып, ақшаны Нәсіп Өтешқалиеваның банк картасына аударуды сұраған.

Желіде өзін хакермін деп таныстырған адамнан тараған ақпаратқа сәйкес, Наурыздың телефоны біршама уақытқа дейін Өзбекстан мен Индонезияда тіркелген, ал қайтыс болған әйелдің картасынан зейнетақы төлемдері шешіліп алынған. Бұл мәліметтер ресми расталған жоқ.

Ақбаян мен оның жұбайының 2-5 қараша аралығында Жангелдинге келгені белгілі. Әлеуметтік желіде Индонезия полиция учаскесінен кадрлар жарияланып жатыр, онда Ақбаян жағдайға түсініктеме бермей, абдырап отырғаны көрінеді.

Туыстары олардың неге жоғалып кеткені туралы ажғдай анықталады деп үміттенеді.

- Ақбаянның тірі табылғнына қуаныштымыз. Сұлтан не болғанын айтып береді деген үміттеміз. Ақиқаттың белгілі болатынына сенеміз, ал Ақбаян көмек алып, балаларына қайта орала алады, - деді туысы.

Бес бала мемлекет қамқорлығында. Оларға әжесі келіп тұрады.

Соңғы ақпаратқа сәйкес, Сұлтан мен Ақбаянды Қазақстанға экстрадициялау мәселесі шешілу үстінде. Тергеу жалғасып жатыр.

Айгүл МАНСУРОВА

Бүгін, 11:01