Келешек мектептері сапалы білім, саналы ұрпақ

Биыл Астанада «Келешек мектептері» жобасы арқылы жеті білім ордасы бой көтерді. Нәтижесінде 28 мың оқушы, жаңа әрі жайлы оқу ошақтарына ауысты. Жемісті жоба мектептердің жүктемесін жеңілдетуге де үлес қосып жатыр. 

Келешек мектептері баланың бойына сапалы біліммен қатар рухани құндылықтарды да сіңіруге күш салады. Сондай-ақ оқу ордасын қауіпсіз әрі жайлы етуге баса мән берілген. Мұны кіреберістен аңғаруға болады. Ғимаратқа бөтен адамның рұқсатсыз кіруіне қатаң тыйым салынған. Оған қоса, табалдырықтағы таблода маңызды мәліметтер ұсынылады. Оның ішінде мектеп қызметкерлеріне қатысты маңызды ақпараттар да бар. Бүгін сондай ерекше оқиғаның куәгері болдық. № 114 келешек мектебінің ұжымы аула сыпырушыны туған күнімен құттықтаған. Асқан Ешімтаев бұл тосынсый болғанын айтып, оқушылар да табло арқылы лебізін білдіріп жатқанын жеткізді.

Асқар Ешімтаев, аула сыпырушы:

- Туған күнімді білемін ғой, бірақ кіреберіске таблоға жазғанын білмеген едім. Соны көріп, көңілім толып, сыйлы болып, рақмет деп айтқым келеді. Балалар жүгіріп келеді кейбір кезде көмектесейік деп, тәрбиеге байланысты ғой бәрі.

Бала тәрбиесінде майда-шүйде болмайды. Мұның өзі оқушыны үлкенді құрметтеуге, еңбек адамдарын сыйлауға үйретсе керек. Алматы ауданында бұрын мектеп тапшылығы болған. Соның әсерінен оқушылар жүктемесі жоғары білім ордаларында оқуға мәжбүр болды. Алайда қыркүйекте жұмысын бастаған мектеп 2,5 мыңға жуық оқушы қабылдап, тапшылық түйіткілін толық тарқатты. 

Ұлбала Тойлыбаева, №114 Келешек мектебінің директоры:

- Екі мектеп болды. Үш ауысымға жақын оқып жатқан. Ол 37 мектеп, ол жерден 700-ге тарта баланы ауыстырдық. 32-мектеп. Ол тығыздығы жоғары мектепке жататын, 3 ауысымның алдында тұрған. Ол мектептен де бізге 700-ге тарта бала ауысты. Біздің ашылғанымызға көп болған жоқ. Соған қарамастан оқушыларымыз республикалық, қалалық және аудандық оилмпиадалардың, конкурстардың жеңімпаздары болып отыр. 

Мектеп қабырғаларына тарихи тұлғалардың суреті салынып, олардың қанатты сөздері жазылған. Одан бөлек, ұлттық болмысты айшықтап, құндылықтарды дәріптейтін туындыларды байқауға болады. Балаларға сабақтан кейін өзіне ұнайтын өнермен айналысуға жағдай жасалған. Бірі сурет салса, енді бірі тоқыма өнерін меңгереді. Кей жас роботатехниканың тілін табуға тырысып жүр. 

Батыржан Құтжан, оқушы:

- Мен роботтарды жасап отырмын. Моторлар, қозғалыс, дыбыс және тағы басқалармен жасап отырамыз. Жай қызық үшін істеп отырмын. 

Келешек мектептері – оқушының сапалы білім алуына және дағдыларын жан-жақты дамытуға мүмкіндік береді. Сондай-ақ, мұнда инклюзивті орта қалыптасқан. Ерекше білімді қажет ететін балалар да мектепке еш кедергісіз кіріп-шығып, арнайы мамандармен оқи алады. 

Авторлары: Бекзат Аманов, Өрден Жарқын