Кешіріңіз, сіздің турыңыз тоқтатылады : Ақтөбеде туристік фирмадан шу шықты

АЛМАТЫ, 3 маусымым – Sputnik. Шетелге саяхаттамақ болған қазақстандықтар Ақтөбедегі туристік фирмаға шағым түсіріп жатыр. Бұл туралы КТК телеарнасы хабарлады.

Саяхатшылардың бірі армандаған демалысына жете алмаса, кейбірі шетелге барып алып, қайта алмай қалған. Солардың бірі – Гауһар Маратқызы. Ол шетелге сапарын алдын ала төлеген. Алайда ұшуға бірнеше күн қалғанда сапардың болмайтыны туралы хабар алған.

"Мен Маврикий және Үндістан елдеріне сапар құнының 50%-ін алдын ала төледім. Сапарым 4 және 10 мамырға жоспарланған болатын. 2 наурызда 400 мың теңге алдын ала төлеп қойғанмын. Ұшуға 3-4 күн қалғанда "кешіріңіз, сіздің чатыңыз жоғалып кетті, біз таба алмадық, сіздің турыңыз тоқтатылады" деп хабарлады", – дейді туристік фирмаға шағымданған Гауһар Маратқызы.

Ал шетелге барып алған туристер үшін жағдай бұдан да күрделі болған. Олар елге қайтатын сәтте қиындыққа тап болған.

"Біз түнгі сағат 3-те Қытайдың Чэнду қаласында қалып қойдық. Ешқандай тіл білмейміз. Туристік фирма бізге билеттерді 14 туристің бесеуіне ғана сатып алғанын хабарлады. Компания басшысының айтуынша, бұл жағдайға техникалық ақау себеп болған", – дейді Ақниет Нұрмұхамедова.

Ал туристік фирма директоры Еркебұлан Аймұратұлы 11 мамырда WhatsApp пен Instagram бір уақытта істен шыққанын айтады.

"Осыған байланысты көптеген клиент бізбен байланысын жоғалтты. Сол кезеңде көптеген тур бұзылып, түсінбеушілікке әкелді. Қазір ақшаны қайтарып жатырмыз: біреуге жартылай, біреуге толық қайтарылды", – дейді ол.

Қазіргі таңда клиенттер полицияға жаппай шағым түсіріп жатыр. Олардың айтуынша, 100-ден астам адам зардап шеккен, ал жалпы шығын 60 миллион теңгеден асуы мүмкін. Даудан кейін туристік компания атауын өзгерткен, бірақ жұмысын жалғастырып отыр.

Полиция қылмыстық іс қозғады.

"Осы дерек бойынша Қылмыстық кодекстің 190-бабы 3-бөлігі 3-тармағы бойынша сотқа дейінгі тергеп-тексеру басталды. Өтініш білдірген барлық жәбірленуші қабылданды", – деді Ақтөбе қаласы ПБ №1 полиция бөлімі бастығының орынбасары Дәурен Ерболатұлы.

Фирма басшылығы ақшаны қайтаруға уәде бергенімен, зардап шеккендер қатаң шара қолдануды талап етіп жатыр. Ресми мәліметке сәйкес, полицияда 20 арыз тіркелген.