Конгода балаларға қатысты зорлық зомбылық көбейді

Зорлық-зомбылық соғыстың бір құралына айналып барады. Сорақысы сол одан көбіне балалар жапа шегіп жатыр. 

Конго Демократиялық Республикасында кәмелетке толмағандарға қарсы қылмыс күрт көбейді. ЮНИСЕФ-тің жаңа есебі ахуалдың ушыға түскенін көрсетеді. 

Конго Демократиялық Республикасында балаларға қарсы зорлық‑зомбылық белең алды. ЮНИСЕФ жариялаған жаңа есепке сәйкес 2025 жылдың алғашқы тоғыз айында елде 35 мыңнан астам жағдай тіркелген. Бұл 2022 жылмен салыстырғанда үш есе көп. Ұйым мамандары көрсеткіш бұдан да жоғары болуы мүмкін дейді. Олардың айтуынша, жәбір көрген балалар қорқып, шағымданбайды. Ең көп зардап шегетін Солтүстік және Оңтүстік Киву, сондай-ақ Итури аймақтары. Дерекке қарағанда қылмысты көбіне қарулы топтар жасайды. Ал құрбандардың басым бөлігі 12-17 жас аралығындағы қыз балалар мен мүмкіндігі шектеулі жасөспірімдер.
Джеймс Элдер, ЮНИСЕФ өкілі:
-  Биылғы жылы Конгоның шығысындағы қарулы қақтығыс кезінде әр 30 минут сайын бір қыз бала зорланған. Бұл бір ғана оқиға емес, жүйелі түрде болған жауыздық. Жәбірленушілердің арасында тіпті нәрестелер де бар. Бұл - соғыстың бір құралы, халықты қорқытудың әдісі.

АҚШ – аймаққа гуманитарлық көмек жеткізетін негізгі елдердің бірі еді. Алайда Трамп әкімшілігіның қаржылай қолдауды тоқтатуынан кейін қиындық туындаған. Мамандардың айтуынша, жапа шеккендер бірден жәрдем ала алмайды. Аймақта көмек көрсету пункттері жеткіліксіз. Кей аналар балаларын ертіп, жаяу ұзақ жол жүруге мәжбүр. Көмек сұрауға қорқып, ауруларын асқындырып алатындар да бар.

Рамату Туре, ЮНИСЕФ өкілі:
- Біз үлкен қасіретке тап болдық. Жәбірленушілердің көбі зорлық көргендерін айтып, көмек сұраудан қорқады.
Халықаралық ұйымдар осындай оқиғалардың алдын алып, салдарын жеңілдету үшін түрлі шараларды жүзеге асыруға күш салып келеді. ЮНИСЕФ жобаларының аясында аталған аймақтарда медициналық және психологиялық көмек көрсетіледі. Сондай-ақ қауіпсіздік орталықтары жұмыс істейді. Дегенмен қаржыландырудың қысқаруы ұйымдардың мүмкіндігін шектеп отыр. 2025 жылы зорлық-зомбылыққа қатысты ЮНИСЕФ жобаларының тек 23 пайызы қаржыландырылды. Салдарынан қарулы қақтығыс зардабын көріп отырған шығыс аймақтың 300 мыңға жуық баласы әлеуметтік қолдаудан қағылды. Мамандар жағдай түзелмесе, мыңдаған балалардың тағдыры қыл үстінде тұр дейді.

Авторы: Әйгерім Ардаққызы