Павлодар облысында тұрмыстағы зорлық зомбылық азайды

Павлодар облысында тұрмыстағы зорлық-зомбылық 22 пайызға азайды.  

Былтыр полицияға отбасындағы ұрыс-керіске байланысты 5 мыңға жуық қоңырау түскен. Үш мыңдай адам әкімшілік жауапкершілікке тартылған. Полиция басқармасының отбасылық-тұрмыстық қатынастар бөлімінің инспекторлары есепте тұрған отбасыларды жиі тексереді. Өз үйінде қысым көрген әйелдер «Дағдарыс» орталығына орналастырылады. 50 адамға арналған қалалық орталықта қазір 35 адам тұрып жатыр. Онда жиырма екі бала бар. Мамандар тағдыр тауқыметін тартқан жандардың құжатын реттеуге көмектесіп, балаларды мектеп пен балабақшаға береді. Сондай-ақ,жұмысқа орналаусға қолдау көрсетеді.

Айнаш Ілиясова, дағдарыс орталығының директоры:

- Біз Павлодар қаласы бойынша тұрмыста зорлық-зомбылыққа ұшыраған әйелдерді қабылдаймыз. Әйел адамдар бұл орталыққа балаларымен де, балаларынсыз да келіп түседі. Мұнда оларға жатын орын мен күніне бес мезгіл тегін тамақ беріледі. Арнаулы әлеуметтік қызметтер көрсету стандартына сәйкес, біз сегіз түрлі қызмет ұсынамыз. Әрбір әйел үшін жеке жұмыс жоспары әзірленіп, соған сәйкес көмек көрсетілді.

Диляра Біләл, қалалық Полиция басқармасының Тұрмыстық қатынастар жөніндегі инспекторы:

- Отбасылық-тұрмыстық қатынастар саласында құқық бұзушылықтар үшін 3064 адам жауапкершілікке тартылды. Отбасылық-тұрмыстық зорлық-зомбылық фактілері бойынша 2624 қорғау нұсқамасы шығарылды. Сондай-ақ 359 адамға қатысты ерекше талаптар белгіленді.