Корей автокөліктеріне деген айнымас махаббат және қытай толқыны 7 жыл ішінде Қазақстанның автоөнеркәсібі қалай өзгерді

Қазақстанда кейінгі 7 жылға жуық уақыт ішінде 856 674 мың жеңіл автомобиль өндірілді. Tengri Auto Қазақстан автокөлік одағының мәліметтеріне сүйене отырып, қазақстандықтардың талғамы қалай өзгергенін және елімізде қай брендтер ең көп шығарылғанын анықтады.

Елімізде қанша автомобиль шығарылды?

ҚАО мәліметінше, 2019 жылы 44 079 көлік құрастырылса, 2020 жылы – 65 мың, 2021 жылы – 81 мың, ал 2022 жылы бұл көрсеткіш алғаш рет жүз мыңнан асты (103 345). 2023 жылы 134 054 көлік, 2024 жылы шамамен сондай көлемде – 133 974 көлік шығарылып, өсім байқалмады. 2025 жылы өндіріс көлемі 158 944-ке дейін артты.

2026 жылдың тоғыз айында 136 548 көлік құрастырылды, бұл – жыл соңына дейін әлі үш ай бар екенін ескерсек, өткен жылғы нәтиженің 86 пайызы.

Қай маркалы автомобильдер ең көп шығарылды?

Осы жылдар ішінде ең көп құрастырылған модель – Chevrolet Cobalt: 169 336 машина, бұл екінші орындағы көрсеткіштен екі есе дерлік көп. Екінші орында – Hyundai Tucson (95 273), үшінші орында – Kia Sportage (44 127).

Келесі кезекте:

Hyundai Elantra (37 560); Chevrolet Nexia (28 549); Hyundai Santa Fe (25 803); Hyundai Accent (21 123); Hyundai Sonata (21 104); JAC J7 (20 225); Hyundai Mufasa (15 245).

Ондықтың алты орнын Hyundai иеленіп отыр, бұл модельдер жиынтығы шамамен 216 мың машинаны құрайды. Cobalt пен Nexia-ның жалпы саны 198 мыңға жуықтайды. Қытайлық брендтерден ондыққа тек JAC енді.

Жеті жыл ішінде маркалар бойынша жағдай айтарлықтай өзгерді. 2019 жылы өндіріс үлесі бойынша алғашқы бестікке Hyundai (32,2 пайыз), Lada (29,5 пайыз), Ravon (10,8 пайыз), Kia (7,4 пайыз) және JAC (5,6 пайыз) кірген болатын.

2025 жылы бұл тізім келесідей: Hyundai (30,3 пайыз), Chevrolet (21,3 пайыз), Kia (16,2 пайыз), JAC (8,1 пайыз) және Jetour (7,8 пайыз).

Өндірістің шамамен 40 пайызын қамтамасыз еткен Lada мен Ravon бестіктен шығып қалды. Hyundai үлесі сәл төмендегенімен, бірінші орнын сақтап қалды. Ал Kia-ның үлесі екі еседен аса өсті.

Жаңа зауыттар мен брендтер

Автомобиль шығару сатылыммен бірдей емес: қай модельді құрастыру керектігін сатып алушылар емес, зауыттар шешеді. Сондықтан өндіріс көлеміне жаңа кәсіпорындардың іске қосылуы үлкен әсер еткен.

2020 жылы Hyundai Trans Kazakhstan зауыты жұмысын бастап, онда Accent пен Tucson құрастырыла бастады. Сол жылы Allur зауытында Chevrolet өндірісі жолға қойылды.

2023 жылы оларға Jetour қосылды, 2024 жылы Allur-да Skoda, ал Hyundai зауытында Genesis құрастырыла бастады.

Негізгі өзгерістер 2025 жылы болды. Алматыда Changan, Chery, Haval және Tank маркаларын шығаратын Astana Motors Manufacturing Kazakhstan ашылды. Қостанайда Kia Qazaqstan зауыты іске қосылып, Allur Geely Galaxy есебінен өндірісін кеңейтті.

2026 жылы Алматыда OMODA және JAECOO құрастырыла бастады. Сондай-ақ Allur зауытында Geely, MG, Soueast, GAC және BAIC өндірісі жолға қойылды.

Дегенмен, бұл маркалардың модельдері әзірге өндіріс көлемі бойынша ең көп шығарылатын ондыққа енген жоқ. Мысалы, Kia Sportage 2023 жылдан бастап Allur-да құрастырылса, 2025 жылы оның өндірісі жаңа Kia зауытының есебінен ұлғайтылды.

Құрастырылған автомобильдер қайда жіберіледі?

Қазақстанда шығарылған автомобильдердің басым бөлігі ел ішінде қалады. 2021 жылы экспортқа 12 103 машина, 2022 жылы – 10 006, 2023 жылы – 9 320 машина жіберілді.

Кейінгі жылдары экспорт көлемі күрт азайды: 2024 жылы шетелге 73 автомобиль, 2025 жылы – 91, ал 2026 жылдың тоғыз айында бар болғаны 40 автомобиль шығарылды.

Қарастырылып отырған кезеңде Қазақстаннан барлығы 42 386 автомобиль экспортталды. Бұл жалпы өндіріс көлемінің бес пайызына да жетпейді. Шетелге жеткізу көлемінің неге мұншалықты азайып кеткені ұсынылған мәліметтерде көрсетілмеген.

Қай модельдер толық цикл бойынша құрастырылады?

Қазақстанда 14 модель ұсақ торапты құрастыру (CKD) технологиясымен шығарылады. Бұл жергілікті зауытта дайын бөлшектерді жинап қана қоймай, шанақты дәнекерлеу және бояу жұмыстары да жүргізілетінін білдіреді.

2018 жылы JAC S3 осындай алғашқы модель болды. 2020 жылы оған Hyundai Accent, 2021 жылы – Tucson, ал 2023 жылы Kia Sportage пен Cerato қосылды. 2024 жылы бұл технологиямен Chevrolet Onix шығарыла бастады.

2025 жылы тізім Hyundai Santa Fe, Jetour X70 Plus, Chery Tiggo 2, Changan CS55 Plus, Haval Jolion және Kia Sorento модельдерімен толықты. 2026 жылы Soueast S07 және Tank 300 қосылды.

Бұдан бөлек, Қазақстанда кейбір автомобиль компоненттері шығарылады. Мәселен, Алматыда Hyundai Tucson және Santa Fe үшін орындықтар, Mufasa, Elantra, Tucson, Santa Fe және Kia Sportage модельдеріне арналған мультимедиялық жүйелер, сондай-ақ климаттық жүйелер мен кілемшелер өндіріледі.

Бізді Google-дың негізгі дереккөздер тізіміне қосыңыз

Қосу