Лента қиылды, бірақ халыққа қызмет еткен жоқ

Жеті ай бұрын Құрманғазы ауданының Кудряшов және Жасталап ауылдарында жаңа медициналық пункттер салтанатты түрде ашылды.

Сол күні ленталар қиылып, ауылдық денсаулық сақтау саласын жаңғырту туралы жарқын сөздер айтылды. Бірақ содан бері жаңа ғимараттардың есігі бір рет те ашылған жоқ.

Кудряшовтағы фелдшерлік-акушерлік бөлім мен Жасталаптағы медициналық пункт өткен жылы "Ауылдық денсаулық сақтауды жаңғырту" жобасы аясында салынған болатын. Биыл ақпан айында ҚР Денсаулық сақтау Министрлігінің вице-министрі Тимур СҰЛТАНҒАЗИЕВ нысандардың ашылуына арнайы келіп лентасын қиды. Ал мердігер "Декор" ЖШС-нің өкілі құрметпен символогикалық кілтті тапсырды. Ауыл халқы медициналық нысандарды жылы қабылдап, ақжаулықты әжелер қуаныштан шашу шашты. 

Алайда жеті ай өтсе де жаңа нысандар әлі күнге халыққа қызмет еткен жоқ, есігі тарс жабық тұр. Жергілікті тұрғындар мазасызданып  медициналық нысандар енді қашан ашылады деп күтуде.

"АЖ" облыстық денсаулық сақтау басқармасынан сұрастырғанда баспасөз қызметі мына тұрғыда жауап жолдады. "Құрманғазы ауданындағы Кудряшов және Жасталап елді мекендерінде салынған медициналық пункттер қазіргі уақытқа дейін Атырау облысы Денсаулық сақтау басқармасы "Құрманғазы аудандық ауруханасы" ШЖҚ КМК-ның теңгеріміне қабылданған жоқ. Бұл нысандар бойынша мердігер мекемеге инженерлік желілер мен жабдықтарға қатысты бірқатар ескертпелер берілген еді. Қазіргі таңда мердігер тарапынан көрсетілген ескертпелер толықтай жойылып, нысандарды қабылдау жұмыстары жүргізілуде. Теңгерімге қабылданғаннан кейін аталған медициналық пункттер өз қызметін көрсететін болады" делінген. 

Ал әзірге Кудряшов пен Жасталап ауылдарындағы ауылдық медицина тек қағаз жүзінде ғана бар.

Ләззат ҚАРАЖАНОВА

Бүгін, 13:18