Маркетплейстерде Қазақстанда жасалған деп аталатын арнайы бөлім ашылады

Елімізде электрондық сауданы одан әрі дамыту мақсатында 2027 жылға дейінгі электрондық сауда дамуының жоспары іске асырылып жатыр. Саланы дамыту үшін Kaztrade компаниясымен бірлесіп, республика кәсіпкерлеріне электрондық сауданы ілгерілету мәселелері бойынша онлайн-семинарлар өткізіледі, деп хабарлайды Egemen.kz. 

Бұл туралы Сауда және интеграция министрлігі Ішкі сауданы дамыту департаментінің директоры Аңсар Оразалиев айтты.

Оның айтуынша, отандық тауарлардың маркетплейстердегі үлесін кеңейту үшін «Қазақстанда жасалған» арнайы бөлімдерін енгізу жұмыстары жүргізіліп жатыр. 2024 жылы электрондық сауда алаңдары үшін бағдарламалық қамтамасыз етуді әзірлеу және сүйемелдеу жобаларын қолдауға арналған сыйақы мөлшерлемесін субсидиялау және кепілдіктер беру түріндегі мемлекеттік қолдау қағидалары қабылданды.

«Отандық маркетплейстердің Қытайдан тауар сатып алуға бағытталған (B2B форматы бойынша) жаңа жобалары іске асырылып жатыр. Тікелей сатып алу делдалдар тізбегін қысқартып, тауар санатына қарай сатып алу құнын 10-30%-ға төмендетуге мүмкіндік береді. Ашық тарифтер ірі импорттаушылар тарапынан орынсыз баға өсімін шектеуге жағдай жасайды», деді Аңсар Оразалиев.

Ведомство өкілінің айтуынша, Ozon және Wildberries маркетплейстері Астана мен Алматыда жалпы ауданы 291 мың шаршы метр болатын үш фулфилмент орталығын салу бойынша инфрақұрылымдық жобаларды жүзеге асырып жатыр. Осыған байланысты биылғы 4 қарашада фулфилмент орталықтарына арналған ұлттық стандарт (сақтаудан және жеткізуден бастап, тапсырыстарды басқару мен тауарды қадағалауға дейін) бекітілді. Ол 2026 жылғы 1 қаңтарда күшіне енеді. Стандарт тек сақтау процестерін ғана емес, тауарларды өткізу мәселелерін де қамтиды, бұл халықаралық тәжірибеге сәйкес келеді. Оның енгізілуі сауда саласына инвестициялардың артуына және электрондық коммерцияның одан әрі дамуына ықпал етпек.

«Электрондық сауданың ұлттық операторы – «Қазпошта» АҚ сыртқы электрондық сауда саласында ірі халықаралық компаниялар YTO Express және JD.com-мен бірлескен жобаларды іске асырып жатыр. Осы жобалар аясында Алматы облысында электрондық сауда тауарларын өңдей алатын үлестіру орталығы салынады, сондай-ақ Орталық Азия мен ТМД нарықтарына арналған JD.com платформасының қазақ-орыс тілді нұсқасы іске қосылады», деп мәлімдеді спикер.

Еске сала кетейік, 2026 жылғы 10 сәуірде Алматыда Қазақстанның ритейл және қаржы секторындағы жаңа технологияларға арналған PROFIT Retail & Finance Day конференциясы өтеді.