Қазақстанда америкалық компанияның кеңсесі ашылады

Қазақстанда Америкалық техно-алпауыт Honeywell корпорациясының өңірлік хабы ашылмақ.Бұл туралы  Қазақстан Республикасы Премьер-министрінің орынбасары, Ұлттық экономика министрі Серік Жұманғарин мен Президент әкімшілігі жетекшісінің орынбасары Ерболат Досаевтың Вашингтонда компанияның аға вице-президенті Стэйси Бернардспен кездесуі барысында мәлім болды. Honeywell әлем бойынша аэроғарыштық технологиялар, құрылыс, қауіпсіздік және өндірістік автоматтандыру саласындағы үздіктер қатарында.

Елімізде 1998 жылдан бері  500-ге жуық жобаны жүзеге асырған. Қазақстандық делегацияның ұсынысына сай, компания Орталық Азия мен Кавказ өңіріндегі елдерге қарайтын өңірлік кеңсесін ашу арқылы ынтымақтастықтың жаңа деңгейіне шығуға ниетті. Бұл Қазақстанға жаңа технологиялардың келуін қамтамасыз етіп қана қоймай, мамандардың кәсібилігін арттырып, жасыл экономиканың дамуына септігін тигізеді.

Кездесуде қазақстандық зауыттардағы қауіпсіздікті нығайту, жасанды интеллект өнімдерін тиімді қолдану арқылы еліміздің мұнай-газ саласындағы жұмыс өнімділігін арттыру мәселелері сөз болды. Honeywell компаниясы ұсынысқа зор қызығушылық танытып, өз өндірісінің кейінгі жетістіктерін таныстырып, бірлесіп жүйелі жұмыс атқаруға уағдаласты