Мажарстанда алманың бағасы келісіне 2,15 еуроға дейін қымбаттады

Бұл – екі жыл бұрынғы бағамен салыстырғанда шамамен 60%-ға қымбат, әрі тарихтағы ең жоғарғы көрсеткіш. Аталған өсім тұтынушылардың қалтасына айтарлықтай салмақ түсіріп отыр.

Салалық басылымдар мен мамандандырылған қауымдастықтардың мәліметінше, бағаның күрт қымбаттауына басты себеп — алманың аз жиналуы.

Биыл елде бар болғаны 160 мың тонна алма жиналады деп күтіледі, оның тек жартысы ғана балғын күйінде сатуға жарамды. Қалған бөлігі шырын мен жеміс езбесін өндіру үшін қайта өңдеуге жіберіледі.

Ауа райының қолайсыздығы жағдайды одан әрі ушықтырды: көктемгі үсіктер, мамыр айындағы салқын ауа райы және жазғы құрғақшылық жеміс ағаштарына елеулі зиян келтірді.

Сонымен қатар, соңғы жиырма жыл ішінде Мажарстандағы алма бағының аумағы екі есе азайып, 20 мың гектарға дейін қысқарған.

Жергілікті өнімнің тапшылығы Мажарстанды Польша, Аустрия және басқа да ЕО елдерінен алма импортын арттыруға мәжбүрлеп отыр.

Сарапшылар қазіргі үрдіс сақталатын болса, бағаның арзандауын күтуге негіз жоқ екенін ескертеді. Осыған байланысты мажарлар алманың орнына банан, алмұрт және цитрус секілді басқа жемістерді жиі таңдай бастады.

Осыдан бұрын Мажарстан Ауыл шаруашылығы министрлігі фермерлерге қолдау көрсетіп, шығынның бір бөлігін өтеу мүмкіндігін жариялаған еді.