Мирный жобасы: ҚМГ мен TotalEnergies жаңа кезеңге өтуге ниетті

ҚазМұнайГаз бен TotalEnergies өкілдері жаңартылатын энергия және мұнай-газ саласындағы ынтымақтастық мәселелерін талқылады.
Кездесу барысында тараптар бірлескен жобалардың қазіргі жай-күйі мен алдағы жоспарларды қарастырды.

Атап айтқанда, Солтүстік Каспий жобасының жүзеге асу барысы сөз болды. ҚМГ басшысы Асхат Хасенов Қашаған кен орнының Қазақстан экономикасы үшін стратегиялық маңызын атап өтіп, қазақстандық үлесті арттыру, жергілікті мамандарды даярлау және технология трансферін дамыту қажеттігін айтты.

Сонымен қатар тараптар Жамбыл облысында қуаты 1 ГВт болатын жел электр станциясын салуды көздейтін «Мирный» жобасын талқылады. Қазіргі кезде базалық жоба дайындалып, егжей-тегжейлі жобалау жұмыстары аяқталуға жақын.

Компаниялар жобаны іске асырудың нақты кезеңіне көшу үшін барлық қажетті рәсімдерді жедел аяқтауға ниетті екенін мәлімдеді.