Мұрат Әбділда түрмеде ән айтып, өз өнерін көрсетті

Желіде белгілі блогер әрі әуесқой әнші Мұрат Әбділдәнің түрме сахнасында ән айтып тұрған сәтінен бейнежазба тарады, – деп хабарлайды Aikyn.kz сайты  Qazaq Today порталына сілтеме жасап.

Бейнежазба Шымкент қаласы бойынша Қылмыстық атқару жүйесі департаментінің әлеуметтік желідегі ресми парақшасында жарияланды. Ресми мәліметке сәйкес, Шымкенттегі №54 түзеу мекемесінде мерекелік іс-шара ұйымдастырылып, оның аясында Мұрат Әбділдә сахнаға шығып, өнер көрсеткен.

«Ассалаумағалейкүм, құрметті бауырлар. Бүгін Шымкент қаласы №54 мекемеде мерекелік іс-шара ұйымдастырылды. Алдағы уақытта осындай іс-шаралар ұйымдастырыла берсін, аман болайық!», – деді ол сахнада сөз сөйлеп тұрып.

Сонымен қатар, блогер түрмеден шыққан соң шығармашылыққа қайта оралатынын жеткізді.

«Түрмеден шыққаннан кейін шығармашылықпен, әндерімді айтамын, бірнешеуін дайындап қойдым. Жақсы жаңалықтар күтіңіздер!», – деп мәлімдеді Мұрат Әбділдә.

Еске салайық, Мұрат Әбділдә Қылмыстық кодекстің 174-бабы – «Әлеуметтік алауыздықты қоздыру» бойынша сотталған. 2023 жылы ол шартты түрде мерзімінен бұрын босатылған еді. Бірақ ол пробация талаптарын бірнеше рет бұзғаны үшін қайтадан қамауға алынып, жазасын өтеу үшін колонияға жіберілген. Қазір Шымкент қаласындағы №54 түзеу мекемесінде жазасын өтеп жатыр.