Өнербаевтың ұлы болғанымыз үшін қатты қысым сеземіз Марғұлан Нұрлан

Jibek Joly телеарнасының «Бүгін LIVE» бағдарламасына Нұрлан Өнербаев пен оның ұлдары қонақ болды. Өнер иесінің қос перзенті де өзінің жолын жалғастырып жүр екен.

— Мен сонау 1978 жылы оқу бітіріп, мамандық таңдар кезінде менің ата-анам ешқандай талап қоймаған. Мен мамандығымды өзім таңдадым. Мен де балаларыма ондай талап қойған жоқпын. Әсіресе, Мақсатқа. Мақсаттың алғашқы мамандығы — экономист. Одан кейін заңгерлікті оқыды. Бұл салада жұмыс та істеді. Бірақ бойда бар қасиет бәрібір жатпайды екен ғой. Баламды бәрібір өнерге алып келді, — дейді студия қонағы.

Ал екінші ұлы Марғұлан Нұрлан 5 жасынан бастап музыка саласында білім алған.

— Марғұланды өнерге 5 жасынан бастап баулыдық. 6 жасында Алматыдағы К. Байсейітова атындағы арнайы мектеп-интернатына оқуға бердік. 6-сыныбында Астанаға ауысып келіп, осы жерде Шабыттың жанындағы мектепті бітірді. Кейін колледжін, сосын университетін бітірді. 18 жыл пианист ретінде оқыған мамандығының бүгін жемісін көріп, қазір шәкірт тәрбиелеп, сабақ беріп жүр, — дейді Нұрлан Өнербаев.

Марғұлан Нұрлан мемлекет және қоғам қайраткерінің ізін жалғау үлкен жауапкершілік екенін жеткізді.

— Нұрлан Өнербаевтың ұлы болғанымыз үшін қатты қысым сеземіз. Бізді әкемізбен салыстырады. «Сенің дауысың әкеңдікіндей емес» деп айтып жатады. Егер өнерлі емес отбасыдан әртіс шығар болса, оларға жеңілірек. Ал көпшілік бізден көп үміт күтеді. Біз де соған сай болуымыз керек. Сол үшін көп әртістің балалары өнер жолын қумайды деп ойлаймын, — дейді студия қонағы.

Экономика мен заңгерлік салаларда кәсіби білім алған Мақсат Өнербай бүгінде өнер жолында еңбек етіп жүр.

— Біздің мынадай бір ұстанымымыз бар: «Жағаласып кетті» дегеннен гөрі, «жалғастырып кетті» дегенді естісек дұрыс болар еді деп ойлаймыз, — деп түйіндеді әншінің ұлы.

Айта кетейік, Қосшы қаласында Нұрлан Өнербаевтың музыка мектебі ашылмақ.