Өңірлік бизнес қарқыны

Шағын және орта бизнесті дамыту – еліміздің экономикалық қуатын арттырып, халықтың әл-ауқатын жақсартудың басты тетігі. Мемлекет басшысы Қасым-Жомарт Тоқаевтың тапсырмасымен бұл бағыттағы жұмыс жүйелі түрде іске асып келеді. Әсіресе өңірлік кәсіпкерлікті қолдау – жалпыұлттық экономиканың берік іргетасы. Осы орайда кәсіпкерлікті дамытуға бағытталған мемлекеттік бас­тамалар мен «Даму» қорының бағдарламалары талай іскер азаматтың арманын ақиқатқа айналдырды. Жаңа өндірістердің қанат жаюына мүмкіндік берді. Қарағанды облысы – соның айқын дәлелі.

Мемлекеттік қолдаудың тиімділігін сезінген кәсіпорын­­дардың бірі – «Sigma Corporation» ЖШС. Бұл компа­ния елімізде кабельдердің барлық түріне арналған муфталарды өндіретін бірегей зауыт саналады. Өнімдері электр желілерінің қауіпсіздігін қам­тамасыз етіп, монтаждау жұ­мыс­ын жеңілдетеді. 2010 жылы құрылған кәсіпорын бүгінде 50-ден астам адамды тұрақты жұмыспен қамтып отыр. Өндіріс әлеуетін арттыруды жоспарлаған компания 2023 жылы «Даму» қорының субсидиялау бағдарламасы бойынша айналым қаражатын толықтыру мақсатында несие алған. Сосын мемлекеттік қол­дау­дың арқасында жылдық 13,25 пайызын мемлекет есе­бінен өтеткен.

– «Даму» қорының қол­­­­дауы арқасында өнді­ріс­­тік ба­замызды жаңа дең­гейге көтеріп, екі жаңа тех­но­логиялық желі­ні іске қо­су­ға мүмкіндік ал­дық. Қазір жаб­дықтар орнатылып, сынақтан өткізіліп жатыр, – дейді ком­панияның коммерциялық директоры Ксения Русакова.

Кәсіпорынның алдағы жос­пары да ауқымды. 2026 жыл­ға дейін жалпы ауданы 1 800 шаршы метр жаңа өндірістік цех салу көзделген. Бұл жоба өндіріс көлемін ұл­ғайтып, жаңа жұмыс орын­дарын ашуға және импортқа тәуелділікті азай­туға бағыт­тал­ған. Ең басты­сы, пайдаланылатын шикізат­тың басым бөлігі отандық өнім.

Қарағандылық «WEC Trade» компаниясы – автохи­­мия саласындағы отандық бренд­тердің бірі. Істі 2016 жылы жеке автожуу орталықтарына арналған құралдар шығарудан бастаған кәсіпорын бүгінде экологиялық таза, денсаулыққа зиянсыз және халықаралық стандарттарға сай өнім өнді­ре­тін заманауи зауытқа айнал­ды. Қазіргі уақытта компания 90-ға жуық түрлі өнім шығарады. 2025 жылы жоба «Өрлеу» жеңілдетілген несие бағдарламасы арқылы 120 миллион теңгеге қар­жы­лан­дырылып, «Ке­піл­­дік қо­ры – 1» бағ­­дар­ламасы бойын­ша 29 мил­­­лион теңге кепілдікке ие болды. Бұл қаражат өндірістік қуатты кеңейтіп, жаңа жұмыс орындарын ашуға жол ашты.

– Біздің жуу құралдары­мыз экологиялық тұрғыдан қауіпсіз, бағасы қолжетімді. Ай сайын шамамен 120 тонна өнім шығарамыз. Қарағанды, Алматы, Жезқазған, Астана қалаларында қой­ма­лары­мыз бар. Қазір өнім­деріміз Wildberries пен Ozon маркет­плейс­тері арқылы сатылады,– дейді компанияның марке­то­ло­гі Дина Беделбаева.

Компания жуырда қа­ладағы қоғамдық орындарда пайда болған бояу іздерін кетіруге арналған арнайы сұйықтық жасап шығарған. Бұл олардың зерттеу және ин­новациялық әлеуетінің жоғары екенін дәлелдейді.

Өңірдегі тағы бір табыс­ты кәсіпорын – «Котлы KZ» ЖШС. Компания «Горняк» маркасымен автоматты жылыту қазандықтарын шығара­ды. Бүгінде елімізден бөлек, Ресей мен Қырғызстан нарығына да өнім экспорттап отыр. Өнім желісіне көмірмен, газбен және электрмен жұмыс істейтін қазандықтар, монша пештері, автоматика жүйелері мен сорғылар кіреді. Компанияның өз патент­­тері бар, ал өндіріс үдерісінде Германиядан әке­лін­ген KUKA дәнекерлеуші роботы қолданылады.

2023 жылы кәсіпорын «2021–2025 жылдарға ар­нал­ған Кәсіпкерлікті дамыту жөнін­де­гі ұлттық жоба» аясында «Bank RBK» арқылы несие алып, қаражатты өн­дірістік ғимаратты сатып алу мен жаңғыртуға жұмсады. Ол соманы «Даму» қоры жылдық 12,75 пайыздық мөл­шерлемені субсидиялады. Қазір кәсіпорында 300-ге жуық адам еңбек етеді. Олар жыл са­йын 15 мыңнан астам жылыту құрылғысын шы­ғарады.

– Мемлекет пен «Даму» қоры­ның қолдауы арқа­сында өндірісті бір нүктеге шоғыр­лан­дырып, барлық үдерісті 30 пайызға тиімді еттік. Бизнес дамуы үшін мұндай қолдау – баға жетпес мүмкіндік, – дейді кәсіпорын басшылығы.

Қарағанды өңірі бойынша біз атап өткен үш кәсіпорын – мемлекеттік қолдаудың нақты нәтижесін көрсететін жарқын мысалдар. Инновация, сапа, еңбекқорлық тоғысқанда эко­номикалық серпін де, әлеу­мет­тік тұрақтылық та арта түседі. «Даму» қорының бағ­дар­ламалары кәсіпкерлерге тек қаржылай демеу емес, сонымен бірге өндіріс мәдениетін жаңғыртып, отандық өнімнің сапасын халықаралық дең­гейге көтеруге мүмкіндік беріп отыр.

Қарағанды облысы