Отандық өндірушілердің халықаралық сертификаттаудан өтуді өтеу шегі ұлғайды

Энергетика министрлігі мен «Мұнай-газ машина жасау саласын дамытуға арналған халықаралық орталық» бірлесіп, ірі мұнай-газ жобаларындағы жергілікті қамтуды ұлғайту жұмысын жалғастырып жатыр, деп хабарлайды Egemen.kz.

Фото: Энергетика министрлігі

Министрліктің мәліметінше, осы мақсатта отандық тауар өндірушілерді ілгерілетуге бағытталған мемлекеттік қолдау шараларының қағидаларына өзгерістер енгізілді. 

«Енді отандық өндірушілердің халықаралық сертификаттаудан өтуді өтеу шегі 3000 АЕК-тен 15 000 АЕК-ке дейін өсірілді. Бағдарламаның жалпы бюджеті 2 млрд теңгеден асады. Бұл шаралар шығындарды 60 млн теңгеге дейін өтеуге мүмкіндік береді», делінген хабарламада.

Қосымша қолдау бизнеске түсетін қаржылық ауыртпалықты азайтып, сертификаттау кезіндегі тәуекелдерді төмендетеді.

Халықаралық сертификаттарға ие болу отандық өндірушілерге мұнай-газ операторларының сатып алуларына кеңірек қатысуға жол ашады. Сондай-ақ, бұл бастама экспортты ұлғайтуға және импортқа тәуелділікті азайтуға ықпал етеді.