Пакетті... тағып қойыңыз ба? Қазақстандық әйел ерекше айыппұл алды

Қазақстандық жүргізушілер үшін сақтық танытатын тағы бір себеп пайда болған секілді. Камера жүргізушіні құлағына қолын ғана тақап тұрғанда, оны телефонмен сөйлесті деп "айыппұл салған" оқиғадан кейін, тағы бір ерекше жағдай болды.

Бұл жолы Алматы тұрғынына көліктің алдыңғы орындығында жатқан заттар үшін айыппұл келді. Жүйе оны қауіпсіздік белдігін тақпаған жолаушы деп қабылдаған көрінеді, деп хабарлайды Tengri Auto.

Бұл туралы Евгения Шестакова Threads-те жазды. Оның айтуынша, камера көліктің алдыңғы орындығында тек жеке заттар болғанына қарамастан, жолаушылар тасымалдау ережесін бұзу фактісін тіркеген.

Қаулыға тіркелген фотосуретте сөмкелер мен басқа да заттар анық көрінеді. Автокөлік иесінің пайымдауынша, жүйе оларды қауіпсіздік белдігін тақпаған жолаушы деп қате таныған болуы мүмкін.

"Шынымды айтсам, бүгін таңертең айыппұл туралы хабарламаны көргенде қатты таңғалдым. Ал қаулыны ашқанда, өз көзіме өзім сенбедім. Енді алдыңғы жолаушылар орындығында жатқан сөмкелер мен пакеттерге де қауіпсіздік белдігін тағу керек сияқты. Маған үлкен ақ пакет үшін айыппұл жазыпты. Иә, ол көлемді, бірақ адамға мүлдем ұқсамайды. Оның үстіне фотода оның кәдімгі пакет екені анық көрініп тұр.
Сондықтан, құрметті қазақстандықтар, кейін айыппұлмен әуре болғыңыз келмесе, енді тек жолаушыларды ғана емес, сөмке мен пакеттерді де белдікпен байлап қою керек сияқты", - деді Евгения.

Автокөлік иесі камера салон ішіндегі заттарды қате таныды деп есептеп, айыппұлға шағым түсіруге ниетті.

Айыппұлды қалай даулауға болады?

Бұған дейін адвокат Жандос Палманов жүргізушілер мынадай жағдайларда қаулыға шағымдануға құқылы екенін мәлімдеген:

әкімшілік жауапкершілікке тарту процедурасы бұзылған жағдайда; көлік иесінің мәліметтерінде қателер жіберілсе; автокөліктің мемлекеттік тіркеу нөмірі қате анықталса; заңбұзушылықтың жеткілікті дәлелдері болмаса, камераның дұрыс жұмыс істейтініне күмән туса немесе фото және бейнежазбалар тағылған айыпты растамаса.

Бұл ретте сарапшы әр жағдайдың жеке қаралуы қажет екенін атап өтті.

Шағым түсіруге қанша уақыт беріледі?

Адвокаттың айтуынша, әкімшілік құқықбұзушылық туралы іс бойынша қаулыға ол табыс етілген немесе алынған күннен бастап 10 тәулік ішінде шағым жасауға болады.

Тіпті бұл мерзім өтіп кетсе де, шағымдану құқығы біржола жойылмайды. Дәлелді себептер болған жағдайда, уәкілетті органға немесе сотқа тиісті өтінішхат беру арқылы бұл мерзімді қалпына келтіруге болады.

Заңгер шағым түсірмес бұрын қаулыны мұқият зерделеуді, заңбұзушылық тіркелген барлық материалды сақтап қоюды және өз дәлелдеріңізді - бейнетіркегіш жазбаларын, фотосуреттерді, куәгерлердің айғақтарын және басқа да құжаттарды жинауды ұсынады.

Айыппұлға шағымды қай жерге болады?

Шағымды келесі жолдармен беруге болады:

eGov және eOtinish платформалары арқылы; Әкімшілік құқықбұзушылықтардың бірыңғай тізілімі (ӘҚББТ) арқылы; Алматы қаласы ПД Әкімшілік полиция басқармасының әкімшілік практика бөліміне жеке бару арқылы (мекенжайы: Алматы қ., Байтұрсынов көш., 185 б).

Google News арқылы жаңалықтарымызды қадағалаңыз

Жазылу