Павлодарда ағаш астындағы кәстрөлден 24 миллион теңге табылды

Павлодарда полицейлер қаладағы кәсіпорындардың бірінде жасалған ірі ұрлықтың бетін ашты. Ұрланған ақшаның жалпы сомасы шамамен 25 миллион теңге болды, деп хабарлайды Tengrinews.kz Polisia.kz-ке сілтеме жасап.

Ұрлыққа ЖШС күзетшісінің қатысы бар болып шықты. Полицейлер ұрланған 24 миллион теңгені бау-бақша серіктестіктерінің бірінен тапты. Ақша алма ағашы түбіндегі кастрөлдің ішіне жасырылған.

"Күдікті ұсталып, Павлодар полиция басқармасының уақытша ұстау изоляторына қамалды. Тәркіленген ақша қаражаты қылмыстық іс материалдарына заттай дәлелдеме ретінде тіркелді", - деп хабарлады Павлодар полиция басқармасының бастығы Балғабай Қапаров.

Тергеу амалдары жалғасып, оқиғаның барлық мән-жайы анықталып жатыр.

Бұған дейін қазақстандық доллар салынған сөмке тауып алып, енді оны не істерін білмей отырғаны туралы жазған болатынбыз.

Google News арқылы жаңалықтарымызды қадағалаңыз