Петропавл тұрғындарынан Tazaqazbot чаты 250 өтініш қабылдады

Петропавл тұрғындары жыл басынан бері «Tazaqazbot» Telegram-чаты арқылы абаттандыру ісіне жауапты мекемелерге 200-ден астам өтініш жолдаған.  

Олар онлайн платформада саябақтар мен аулалардың жай-күйінен бастап жол сапасы және жарықтандыру мәселесіне дейін көтерген. Көпшілік әлеуметтік желідегі бұл кері байланыс кемшіліктерді дер кезінде жойып, қаланы таза ұстауға мүмкіндік беретінін айтады. Дегенмен тұрғындар арасында мұндай қызметтің барын білмейтіндер де бар.

Қала тұрғындарынан «Tazaqazbot» чаты арқылы абаттандыруға қатысты 250-ге жуық өтініш түскен. Қоршаған ортаға жанашырлар қала тазалығынан бөлек, жол жөндеу, айналаны көгалдандыру секілді абаттандыру мәселесін көтерген. Онлайн платформа 2024 жылы «Таза Қазақстан» республикалық бағдарламасы аясында іске қосылды. Жауапты мамандар бұл  тұрғындар мен коммуналдық  кәсіпорындар арасындағы кері байланыстың тағы бір құралы болғанын айтады.

Бердімұрат Баймұқан, ТҮКШ бөлімінің баспасөз хатшысы:

- Барлық түскен өтініштер бойынша жұмыстар толық көлемде орындалып, нәтижелері фотоесептермен расталды. Чат-боттың жұмысы туралы ақпарат БАҚ құралдары арқылы және қала әкімінің әлеуметтік желілері арқылы таратылады. Түскен өтініштер қабылданып, өңделеді және тиісті салалық әрі жауапты бөлімдерге жолданады.

Телеграм-ботқа түскен хабарламаларды 30-дан астам оператор және жергілікті атқарушы орган өкілдері қадағалап отырады. Олар әр өтінішті жеке қарап, уақытылы жауап беруге міндетті. Мысалы, қоқыс шығаруға бес күнге дейін, ал жолдарды жөндеуге одан да көп уақыт беріледі. Себебі жобалық-сметалық құжаттама әзірлеу және қаржыландыру көзін анықтау үшін уақыт қажет. Телефон қосымшасы арқылы көрсетілетін бұл қызмет туралы тұрғындардың өзінен де сұрап көрдік. Кейбірі мұндай мүмкіндік туралы білмейміз дейді.

Диана Мұсайбекова, қала тұрғыны:

- Мен мұндай қызмет түрі барын естімедім. Тіркеліп қойдым. Енді білетін боламын. Қала тазалығын көпшілікпен бірге қадағалап, айналаны таза ұстауға көмектесемін.

Тамара Морозова, қала тұрғыны:

- Әрине, жауапты мекемелер қала тазалығын тәулік бойы бақылап отыра алмайтыны анық. Тазалық пен абаттандыруға қатысты мәселені қала басшылығының назарына тікелей жолдауға бұл үлкен мүмкіндік. Бірақ мұндай чат барын осыған дейін білгенім жоқ.

Қаланың кез келген тұрғыны чатқа  өтініш қалдыра алады. Ол үшін телефон нөмірін Telegram-да тіркеп, жеке сәйкестендіру нөмірін көрсету қажет. Хабарламада орналасқан жері, фотосуреті және мәселенің қысқаша сипаттамасы болуы керек. Ол жауапты қызметтерге мәселені тез арада қарауға мүмкіндік береді. Бірақ сол мүмкіндікті тұрғындар пайдалана алмай отыр. Шашылған қоқыс немесе күрелмеген қарды көре тұра олар шағымданудің цифрлық түрін қолданудан бейхабар. Себебі оның қызметі жайлы ақпараттандыру жұмыстары тиісті деңгейде жүргізілмеген.

Авторлары: Елдос Кәкенов, Наталья Волкова, Куаныш Казбеков