Психологиялық соғыстың бір бөлігі сарапшы Иранның мұнайдың 200 доллар болатыны туралы мәлімдемесі жайында

АҚШ-тың Ормуз бұғазы маңындағы Иран нысандарына жасаған жаңа соққыларынан кейін, Тегеран мұнай бағасы барреліне 200 долларға дейін көтерілуі мүмкін деп сес көрсетті. Мұнай-газ саласының қазақстандық сарапшы-талдаушысы Асқар Исмаилов Tengrinews.kz редакциясына мұндай болжамдардың қаншалықты шындыққа жанасатынын айтып берді.

АҚШ-тың Ормуз бұғазы маңындағы Иран нысандарына жасаған жаңа соққыларынан кейін, Тегеран мұнай бағасы барреліне 200 долларға дейін көтерілуі мүмкін деп сес көрсетті. Мұнай-газ саласының қазақстандық сарапшы-талдаушысы Асқар Исмаилов Tengrinews.kz редакциясына мұндай болжамдардың қаншалықты шындыққа жанасатынын айтып берді.

Бұған дейін Иран қарулы күштерінің "Хатам әл-Анбия" орталық жедел штабының өкілі Эбрагим Зольфагари АҚШ тарапынан шиеленістің одан әрі ушығуы мұнай бағасының барреліне 200 долларға дейін өсуіне әкеп соғуы мүмкін екенін айтты.

"Америкалықтар біздің өңірдегі әскери авантюраларын жалғастыра берсе, ешқандай келісімге қол жеткізілмейді. АҚШ үкіметі тек күш қолдану тілін ғана түсінетінін бірнеше рет көрсетті. (Барреліне - ред. ескертпесі.) 200 доллар болатын мұнайға дайындалыңыздар", - деп жазды ол X әлеуметтік желісінде.

Бұл мәлімдеме Ормуз бұғазы маңындағы Бендер-Аббас ауданындағы нысандарға жасалған "қорғаныс соққылары" аясында айтылды.

Шұғыл мәлімдемелерге қарамастан, мұнай нарығы болып жатқан жағдайға әзірге сабырмен қарап отыр. 28 мамырдағы жағдай бойынша, ICE Лондон биржасында Brent маркалы эталондық мұнайдың баррелі 95–99 доллар аралығында саудаланды.

Талдаушылардың айтуынша, инвесторлар Тегеран тарапынан мұнай бағасын көтеру туралы қоқан-лоқыларды бірінші рет естіп отырған жоқ, сондықтан әзірге жеткізілімнің жаппай тоқтау қаупін көріп тұрған жоқ.

Мұнай-газ саласының сарапшы-талдаушысы Асқар Исмаилов мұнайдың 200 долларға дейін қымбаттауы туралы мәлімдемелер нақты болжамнан гөрі саяси қысым құралына көбірек ұқсайтынын айтады.

"Бұл - Иранға тән риторика. Өте болжамды дүние. Бірақ мұнайдың 200 долларға жету сценарийі негізгі болжам емес, көбіне қысым көрсету элементі ретінде қарастырылады", - деп атап өтті сарапшы.

Оның айтуынша, Тегеран әлемдік нарықтарға әлемдік мұнай экспортының едәуір бөлігі өтетін Ормуз бұғазының стратегиялық маңызын еске салуға тырысып отыр.

"Хатам әл-Анбия" штабының өкілі Эбрагим Зольфагари деген кім? Ол мұнай трейдері ме? Жоқ. Тегеран жай ғана нарықтың есіне Ормуз бұғазы мен әлемдік энергетиканың осал тұстарын салып қоюды көздейді", - дейді Исмаилов.

Талдаушының пікірінше, Тегеранның қазіргі мәлімдемелері Батысқа жасалған психологиялық және дипломатиялық қысымның бір бөлігі.

"Иран бәсті жоғарылатып, Батысты шиеленістің одан әрі ушығуынан сескендіруге тырысып жатыр. Нарық мұндай сигналдарды талай рет естіген. Сондықтан әзірге реакция бірқалыпты. "Қасқыр келді!" деп айғайлаған бала туралы ертегіні еске түсіріңізші", - деді Исмаилов.

Сарапшының айтуынша, бағаның күрт шарықтауы теориялық тұрғыда және тек бақылаудан шыққан ауқымды шиеленіс жағдайында ғана мүмкін.

"Шындық мүлдем басқа. Қазірше мұндай жағдайдан алыспыз. Оның үстіне, әлемдік экономикаға мұндай қымбат мұнайдың қажеті жоқ. Ондай жағдайда тұтыну көлемі күрт азайып кетеді", - деп түсіндірді ол.

Исмаиловтың айтуынша, нарық бұған дейін де бағаның күрт өсу кезеңдерін бастан өткерген, алайда мұндай секірістер тез арада қайта реттеліп отырған.

"Біз бағаның барреліне 120 долларға дейін көтерілгенін көрдік, бірақ нарық тез арада кері шегінді. Себебі қарапайым: нарықта әлі де шиеленіс бақылауда деген сенім бар", - деді талдаушы.

Оның айтуынша, Ормуз бұғазының толық жабылуы Иранның өзіне де соққы болып тиеді, өйткені ел экономикасы мұнай экспортына тікелей тәуелді.

Тағы оқыңыз: АҚШ пен Израиль Иранды бөлу мақсатында "жұмсақ соғысқа" көшті – Тегеран