Қарағанды облысында су айдындарында мұз әлі жұқа

Қарағанды облысында құтқарушылар мен полицейлер су айдындарына жиі рейд ұйымдастырып, тексеру жұмыстарын күшейтті. Қазір күн жылы. Сондықтан жұқа мұздың үстімен жүру өте қауіпті. Рейд кезінде көңіл көтеріп, бейнежазба түсіру үшін мұзға шыққан жасөспірімдер кездескен. 

Балалардың ата-аналары әкімшілік жазаға тартылды. Мұздың қалыңдығы кем дегенде 10 сантиметрге жетпей қауіпті саналады. Төтенше жағдай қызметкерлері тұрақты түрде профилактикалық жұмыс жүргізеді. Олар балық аулау құралдары дүкендерінің сатушыларына және балықшылар мен тұрғындарға қауіпсіздік ережелерін түсіндіріп, жадынама таратуға кіріскен. 

Сұлтан Зейнуллин, Қарағанды қаласы ТЖ басқармасы азаматтық қорғаныс тобының аға офицері:

- Қысқы кездегі мұз айдынының бетінде болу ережелері мен тәртіптерін түсіндіру жұмыстарын жүргізіп, бұзушылықтар анықталған жағдайда айыппұл салу жұмыстары жүргізіліп жатыр. Айыппұл ҚР Әкімшілік кодексінің 412 бабы бойынша салынады. Жеке тұлғаларға жеті айлық есептік көрсеткіш көлемінде салынады.