Қарағанды тұрғындарының ауланы қоқыстан тазарту жұмыстарына көңілі толмайды

Қарағанды тұрғындарының қаладағы қар тазалау жұмысына көңілі толмайды.

Орталық даңғылдар тұрақты күреледі, ал шеткі көшелер коммуналдық қызметтің назарынан тыс қала береді, дейді көпшілік. Сонымен қатар ауладағы қоқыс та уақытында шығарылмайды. Жаңадан салынған тұрғын үйлер аумағында қоқыс контейнерлері жеткіліксіз. 

Жүргізушілер көлігін қарға сірескен тұраққа осындай қиындықпен қоюға мәжбүр. Коммуналдық техникалар жүріп өткен соң аялдамалар маңында және көлік тұрақтарында осындай үйінділер пайда болады. Соның салдарынан қозғалыс жолақтары да тарылып қалды. Қала тұрғындары тротуарларды тазалау жұмысы жүйелі жүргізілмейтінін айтады.

БЛИЦ

- Толмайды көңілім, міне кешеден қар жауып жатыр, транспорттың тазалағаны көрінбейді. Мен көп жүрем осы Қарағандыда, бірақ көрмеймін. Міне тратуарларды өздеріңіз көріп тұрсыздар, әзер жүреміз, үлкен кісілерге өте қиын.

- Бір жерге мысалы асығып жүресің. Үлгеру керек, уақыт, сағат дегендей, больницаға барасыз, сондай кездерде қорқынышты жүру. Уақытылы тазалап тұру керек шығар, осыған жаңағы кісілер бар ғой міндеттелген.

Амантай Рәшитов, Қазыбек би ауданы әкімдігінің бөлім басшысы:

- Жолдарды тазалау екі ауысымда жүргізіледі. Әрине бүкіл қаланы бірден қамту мүмкін емес. Қосалқы жолдардың, тротуарлардың да қарын күреп жатырмыз. Соңғы екі күнде қар қалың жауып, жұмыс көбейді. Шағымдар түсіп жатыр, біз барынша жедел әрекет етуге тырысамыз.

Қала тұрғындарының аулаларды қоқыстан тазалау жұмысына да көңілі толмайды. Тұрмыстық қалдықтар үшін қойылған контейнерлер толы күйінде бірнеше күн тұратын кездер болады. Қала бойынша барлығы 7 мың контейнер бар, бірақ бұл аз,-дейді қоғам белсендісі Павел Подвигин. Әсіресе жаңадан салынған көпқабатты үйлерде тұрғын саны көп болғандықтан тіпті жетіспейді.

Павел Подвигин, қала тұрғыны:

- Контейнерлер  сол аулада тұрып жатқан адам санына қарай есептеліп қойылуы керек. Бірақ бұл талап орындалып отырған жоқ. Бір адам жылына 1,7 текше метр қоқыс шығарады. Қазір қалада жаңа үйлер көптеп салынып жатыр. Олардың ауласындағы контейнерлер бір мезгіл ғана тазаланады. Сондықтан қызмет көрсетушілердің жүктемесін қарастырып, келісімшартты өзгелермен жасаған жөн.

Руслан Нұрланұлы, тілші:

- Қыс басталғалы тұрғындардан қар тазалауға қатысты өтініш көбейген. Ауа райы күрт құбылғанда коммуналдық қызмет қала көшелерін тазалап үлгермей жататын кездер болады. TazaQazBot чатының қаншалықты жедел жұмыс істейтінін білу үшін мен мына аялдама маңындағы қарды тазалау жөнінде өтініш жолдадым. Өтініш қабылданып, жүйеде тіркелді және оны орындауға жауапты тұлға да көрсетілген. Мәселе жақын арада шешіледі деген жауап алдық.

Былтыр чат-бот арқылы өңір бойынша екі мыңға жуық өтініш түскен. Алайда көшедегі сауалнама көрсеткендей, халықтың көбі бұл байланыс тәсілі туралы әлі де бейхабар.

БЛИЦ

- «Таза Қазақстан» Telegram каналы туралы естімедім. Бірақ халыққа қызмет етуге жақсы болар еді. 

- ХХІ ғасыр болғандықтан электронды техника дамығандықтан осындай мүмкіндікті қолдану керек деп ойлаймын.

Дмитрий Калмыков, эколог:

- Мен мұндай электронды қызмет түрлерін пайдаланғанды жақсы көрем. Бірақ дәл осы «TazaQazBot» чатына өтінішімді енгізе алмадым. Қаншама адам осы жағдайға тап болды деп ойлаймын. Халық үшін тиімді нәрсе, бірақ ол туралы кеңінен насихаттап, тіпті қалай пайдалану керектігін түсіндіру керек қой. 

«TazaQazBot» туралы жұртшылықтың көбі біле бермейді. Оны насихаттау жұмысы тиісті деңгейде жүргізілмеген. Жаңа байланыс қызметінің қолданушылары көбейе түскен сайын елді мекеннің тазалығы, экологиясы жақсарып, жұмыс нәтижесі көрінетіні сөзсіз. Көпшіліктің ортақ пікірі осы. 

Руслан Нұрланұлы, Сайлау Игіліков, Аман Хамит