Қаржы саласы цифрлық бақылауға көшті

Central Asia Fintech Summit барысында еліміздің Қаржы нарығын реттеу және дамыту агенттігі жаңа FinAI цифрлық платформасын таныстырды. Аталған құрал қаржы саласындағы жағдайды дәлме-дәл уақытта бақылап, тәуекелдерді басқаруға және заңбұзушылықтарды анықтап, жедел әрекет етуге мүмкіндік береді. Бұл - қаржы саласын бақылаудың дәстүрлі әдісінен цифрлық шешімдерге толық көшу жолындағы маңызды қадам. 

Бүгінде банктердің 75%-ы жасанды интеллектті түрлі бағытта пайдаланып отыр.  Клиенттің несиелік төлем қабілетін бағалаудан бастап алаяқтық әрекеттерді анықтау жүйесіне дейін заманауи технология атқарады. «Қаржы саласын әрі қарай дамыту үшін инвестиция, бірыңғай стандарттар және сапалы деректер қажет», - дейді Қаржы нарығын реттеу және дамыту агенттігінің төрағасы Мәдина Әбілқасымова.

Мәдина Әбілқасымова, ҚР Қаржы нарығын реттеу және дамыту агенттігінің төрағасы:

- Қаржы ұйымдары жасанды интеллектті өз бетінше қолданып жатыр. Әзірге бәріне ортақ нақты ереже жоқ. Әр ұйым өз мақсатына қарай осы жүйені баптап, тәжірибе жасап отыр. Сондықтан бірыңғай стандарт қалыптастыру қажет. 

Саммит аясында FinAI бірыңғай платформасы таныстырылды. Бұл қаржы институттарының ақпараттық жүйесін бір арнаға тоғыстырады. Нақтырақ айтсақ, банктер, микроқаржы ұйымдары, сақтандыру және инвестициялық компаниялар ортақ экожүйемен бақыланады. Мұнда азаматтардың шағымын талдайтын «Өтініш фабрикасы» мен QAINAR киберқалқаны енгізілген.

Тимур Әбілқасымов, ҚР Қаржы нарығын реттеу және дамыту агенттігі төрағасының бірінші орынбасары:

- Цифрландыру күшейген сайын киберқауіп те артады. Сол себепті бізде QAINAR жүйесі бар. Оған 100-ден аса қаржы ұйымы кіреді. Қазір 14 модуль іске қосулы. Ортақ иммунитет жүйесі банктердің әлсіз тұстарын хабарлап отырады. Бүгінге дейін 700-ден аса кемшілік анықталып, қаржы ұйымдарына жіберілді. 

Қаржы нарығын реттеу және дамыту агенттігі FinAI жүйесі арқылы банктердің несие қоржынындағы әрекетін дәлме-дәл уақытта бақылайды. Оған қоса базалық мөлшерлеме өзгерсе, арнайы тест жүргізеді. 

Авторлары: Аршын Кемелжан, Эдуард Кон