Қазақстан Денсаулық сақтау министрлігіндегі қайта ұйымдастыру: егжей тегжейі

Денсаулық сақтау министрлігінің Медициналық және фармацевтикалық бақылау комитеті екі бөлек ведомствоға бөлінді. Тиісті қаулыға премьер-министр Олжас Бектенов 2026 жылғы 3 тамызда қол қойды. Олардың қашан жұмыс істей бастайтыны және комитеттің не үшін қайта ұйымдастырылғаны туралы Tengri Health тілшісі баяндайды.

Қандай комитеттер құрылды?

Үкімет қаулысына сәйкес, Медициналық және фармацевтикалық бақылау комитеті Медициналық бақылау комитетіне және және Фармация комитетіне бөлінді.

Қайта ұйымдастырудан кейін Денсаулық сақтау министрлігінің құрылымында үш комитет жұмыс істейтін болады:

Бұрыннан бар - Қазақстан Республикасы Денсаулық сақтау министрлігінің Санитариялық-эпидемиологиялық бақылау комитеті; Жаңадан құрылған екеуі - Қазақстан Республикасы Денсаулық сақтау министрлігінің Медициналық бақылау комитеті және Фармация комитеті;

Анықтама: Медициналық және фармацевтикалық бақылау комитеті (МФБК) - Денсаулық сақтау министрлігінің құрылымындағы медициналық және фармацевтикалық қызмет саласында мемлекеттік бақылау мен қадағалауды жүзеге асыратын ведомство. Ол атап айтқанда, медициналық көмектің сапасын, дәрі-дәрмек пен медициналық бұйымдардың айналымы тәртібін, лицензиялық талаптардың сақталуын тексереді және азаматтардың сапасыз медициналық көмекке қатысты шағымдарын қарастырады.

Олар жұмысын қашан бастайды?

Медициналық және фармацевтикалық бақылау комитетінің баспасөз қызметінің хабарлауынша, ведомство әзірге бұрынғы режимде жұмысын жалғастырады. Екі жаңа комитет ресми түрде әлі қызметіне кіріскен жоқ.

Қазір қайта ұйымдастыру процедурасы жүріп жатыр: қызметкерлерге алдағы өзгерістер туралы ескертілді, ал мамандар жаңа комитеттер туралы ережелерді, олардың құрылымы мен штаттық кестесін дайындап жатыр.

"Комитет қызметкерлерін, соның ішінде төрағаларды тағайындау құрылым мен штаттық кесте бекітілгеннен кейін жүзеге асырылады", - деп хабарлады ведомство.

Медициналық және фармацевтикалық бақылау комитетінің төрағасы Бауыржан Жүсіпов тілшімен әңгімелесу барысында комитетті қайта ұйымдастыруға байланысты барлық ресми процедуралардан кейін жаңа заңды тұлғаларды тіркеуге екі ай уақыт берілетінін айтты.

"Яғни, шамамен екі айдан кейін жаңа комитеттер жұмыс істей бастайды", - деді ол.

Комитетті неге бөлу туралы шешім қабылданды?

Бауыржан Жүсіповтің айтуынша, бөлу шешімі әр бағыт бойынша жұмысты күшейту қажеттілігімен байланысты.

Төрағаның сөзіне қарағанда, қазіргі уақытта комитет бірден екі үлкен блокқа жауапты: медициналық көмек көрсету сапасын бақылау және дәрілік заттар мен медициналық бұйымдардың айналымы саласындағы бақылау.

"2025-2026 жылдары комитет қадағалау функциялары саласында жаңа өкілеттіктерге ие болды. Қазір медициналық көмек сапасын басқаруды жетілдіру бойынша кешенді жоспар іске асырылып жатыр - онда көптеген іс-шаралар қарастырылған, жаңа Медициналық бақылау комитеті соларға басымдық беретін болады", - деп түсіндірді ол.

Екінші ведомство - Фармация комитетіне келетін болсақ, Жүсіповтің сөзінше, онда дәрілік заттар мен медициналық бұйымдар айналымы саласын реттеуге қатысты барлық мәселелер шешіледі.

"Жаңа препараттарды тіркеу, бағаны реттеу, дәрілік заттар айналымы саласындағы бақылау. Әсіресе, бұл тіркелмеген және контрафактілік препараттар мен медициналық бұйымдарға қатысты", - деп атап өтті төраға.

Бұл өңірлердегі департаменттердің жұмысына қалай әсер етеді?

Бұрынғы Медициналық және фармацевтикалық бақылау комитетінің аумақтық бөлімшелері де екі бөлек құрылымға - медициналық бақылау және фармация бөлімшелеріне бөлінеді.

Бұл дегеніміз, Медициналық бақылау комитетінің жаңа департаменттері еліміздің барлық өңірлерінде - 17 облыс пен үш қалада жұмыс істейтін болады.

Фармация комитеті үшін де аумақтық бөлімшелер құрылады. Оның құрамына Дәрілік заттар мен медициналық бұйымдарды сараптау ұлттық орталығы кіреді.

Құжатқа сәйкес, үкімет қаулысы қол қойылған күннен бастап күшіне енеді.

Google News арқылы жаңалықтарымызды қадағалаңыз

Жазылу

Денсаулық сақтау министрлігі

комитет