​Қазақстан Энергетика министрлігі: Новороссийскідегі өрттен кейін мұнай өндіру және экспорттау штаттық режимде жүзеге асырылуда

Қара теңіз порты Новороссийскідегі отын терминалындағы өрт сөндірілді.

Бұл туралы Краснодар өлкесінің жедел штабы хабарлады.

Өрт дүйсенбі күні таңертең шамамен 120 шаршы метр аумақта болды. Алдын ала мәлімет бойынша оған ұшқышсыз ұшу аппараттарының шабуылы себеп болған. Өртті сөндіруге 38 адам және 10 техника жұмылдырылды, оның ішінде Ресей ТЖМ Краснодар өлкесі бойынша Бас басқармасының мамандары да болды.

Новороссийск порты Ресейдің оңтүстігіндегі ең ірі мұнай құю кешені және мұнай мен мұнай өнімдерін экспорттаудың негізгі тораптарының бірі. Салалық дереккөздерге сәйкес, 2025 жылы Новороссийск терминалдары арқылы шамамен 19,8 млн тонна мұнай өнімдері ауыстырылып тиелген. Бұған дейін, 2025 жылдың қараша айында ҰҰА шабуылының нәтижесінде "Шесхарис" мұнай базасы мен жағалаудағы мұнай ауыстырып тиеу кешенінің құрылыстары зақымдалған болатын.

Болған оқиға аясында Қазақстан Республикасының Энергетика министрлігі қазақстандық мұнайды өндіру және экспорттау штаттық режимде жалғасып жатқанын мәлімдеді. Ведомство жеткізілімдердің тоқтатылмағанын, тиеу жұмыстары кестеге сәйкес жүзеге асырылып жатқанын атап өтті.

Бүгін, 16:57