Қазақстан мен Эстония академиялық білім алмасады

Қазақстан және Эстония жоғары білім саласындағы байланысын одан ары нығайтпақ.

Елордада өткен ректорлар форумында Эстонияның 6 жоғары оқу орнымен екі-жақты меморандумға қол қойылды. Оның ішінде ең көне - Тарту және Таллин университеттері де бар.

Тұңғыш рет үкіметаралық деңгейде Ғылым және жоғары білім министрлігі Эстонияның Ғылым және білім министрлігімен арнайы келісімшартқа қол қойды. Бұл университеттер арасында студенттер мен оқытушылар алмасуға, академиялық ұтқырлыққа, ғылыми зерттеулермен айналысуға, «Болашақ» бағдарламасының аясында тағылымдамадан өтуге таптырмас мүмкіндік береді.

Саясат Нұрбек, ҚР Ғылым және жоғары білім министрі:

- Жалпы Эстонияда 6-ақ жоғары оқу орны бар. Бірақ алтауы да сапалы және ғылыми әлеуеттері өте жоғары. Орта білімде де Эстониядан үйренеріміз бар. Пиза халықаралық зерттеулерінде Эстония дәстүрлі түрде топ-5 кіреді. Келісімшарттар арқасында Эстониялық университеттермен және орта білім жүйесімен өте тығыз байланыстар басталады.

 3,5 жылдың ішінде Қазақстан Орталық Азиядағы үлкен академиялық орталыққа айналды. 40-қа жуық озық шетелдік филиалдар ашылды. Болашақта 100 мыңға тарта шетелдік студентті Қазақстанға тарту көзделіп отыр. Нәтижесінде экономикамызға миллиардтаған қаржы құйылады, дейді сарапшылар.

Айдос Жұманазаров, сарапшы:

- Шетелден келген профессорлардың білімін осы жерде алуға болады. Біз бұл жерде олардың тәжірибесін де пайдалана аламыз. Олардың сол жақтан алып келген білімі академиялық құрамға да тікелей әсер етеді. Яғни қазақстандық профессорлар, академиялық құрам солардан да білім алу арқылы көп пайдасын тигізеді.

Эстония президенті Алар Каристің айтуынша, Балтық елінде цифрландыру үрдісі осыдан 30 жыл бұрын басталған. Нәтижесінде мемлекет сандық жүйеге негізделген біртұтас қоғам құра алды.

Алар Карис, Эстония Республикасының Президенті:

- Студенттеріміз жасанды интеллектіні қолдану тәсілдерін критикалық ойлау және критикалық оқытумен бірге меңгеріп жатыр. Әрине, алдымен мұның заңнамалық тұрғыдан реттелгенін де айта кету керек. Өйткені бірнеше тілде қызмет көрсететіндіктен, кейбір құқықтық мәселелердің туындайтыны анық. Бірақ біз олардың бәрін еңсереміз деген ойдамын.

Осылайша, Қазақстан мен Эстония арасындағы ғылыми байланыс беки түсті. Назарбаев университетіне барған эстониялық президент Алар Карис студенттерге дәріс оқып, жаһандану кезеңіндегі білімнің маңызына тоқталды. Саясаткер Астана мен Таллин ғылыми инновациялық шешімдер арқылы жастарды даму үдерісіне дайындауға әсте әзір екенін жеткізді.

Авторлары: Мирлан Алтынбек, Ислам Махамбет