Қазақстан мен Түркия стратегиялық серіктестер Джевдет Йылмаз

Ол сөзін еліміздің қонақжайлығына алғыс айтудан бастады.

— Түркия Республикасының Президенті, құрметті Режеп Тайип Ердоған мырзаның және бауырлас түрік халқының сіздерге, сондай-ақ барша Қазақстан халқына жолдаған ыстық сәлемін жеткізгім келеді. Маған және делегациямызға көрсетілген жылы қабылдау мен қонақжайлық үшін шынайы алғысымды білдіремін, — деді ол.

Сонымен қатар, екі ел арасындағы тығыз қарым-қатынасқа мемлекет басшыларының сүбелі үлесін атап өтті.

— Бүгінгі деңгейге жеткен ынтымақтастығымыздың қалыптасуында мемлекет басшылары — Режеп Тайип Ердоған мен Қасым-Жомарт Тоқаев мырзалардың саяси ерік-жігері мен ортақ көзқарастары шешуші рөл атқарды. Түркі әлемінің рухани ұстазы Қожа Ахмет Ясауи бабамыздан бастау алатын тағылымға сүйене отырып, Қазақстан жеріндегі терең рухани мұра аясында сіздермен бірге болу — біз үшін үлкен мәртебе әрі қуаныш, — деп мәлімдеді вице-министр.

Джевдет Йылмаздың сөзінше, Қазақстан мен Түркия — стратегиялық серіктестер.

— Бүгін өткен екіжақты кездесуімізді тек қолданыстағы ынтымақтастықты саралайтын техникалық алаң ғана емес, алдағы кезеңнің сауда-экономикалық бағыттарын айқындайтын стратегиялық кеңес алаңы ретінде қарастырамыз. Түркия мен Қазақстан — тек достас, бауырлас мемлекеттер ғана емес, сонымен қатар ортақ тарихы, мәдениеті, жадысы мен болашаққа деген көзқарасы тоғысқан стратегиялық серіктестер, — деді ол.

Сондай-ақ ол осы стратегиялық серіктестікті одан әрі нығайту мақсатында мамыр айында Жоғары деңгейдегі стратегиялық ынтымақтастық кеңесінің 6-отырысын өткізуді жоспарланып отырғанын мәлімдеді.

Айта кетейік, бұған дейін Мәжіліс Қазақстан мен Түркия арасында әскери мүліктің транзитіне қатысты құжатты қабылдағанын жазғанбыз.