Қазақстанда еңбек ету қабілетінен айырылу және асыраушысынан айырылу бойынша төлемдер артады

Қазақстанда жұмыс істеу қабілетінен айырылу және асыраушысынан айырылу жағдайлары бойынша төленетін әлеуметтік төлемдерді ұлғайту жоспарланып отыр. Еңбек министрлігі тиісті бұйрық жобасын "Ашық НҚА" порталында жариялады, деп хабарлайды Tengrinews.kz.

Төлемдер қаншалықты өседі?

Еңбек және халықты әлеуметтік қорғау министрлігі "Мемлекеттік әлеуметтік сақтандыру қорынан төленетін әлеуметтік төлемдердің мөлшерін арттыру туралы" Үкімет қаулысының жобасын дайындады.

Құжатқа сәйкес, МӘСҚ-тан төленетін жұмыс істеу қабілетінен айырылу және асыраушысынан айырылу жағдайы бойынша әлеуметтік төлемдер мөлшерін 2027 жылғы 1 қаңтардан бастап 8,5 пайызға арттыру жоспарланып отыр.

Министрлік бұл шара төлем алушыларды әлеуметтік қорғау деңгейін арттыруға бағытталғанын атап өтті. Қаулы жобасы 2 қарашаға дейін көпшілік талқылауы үшін жарияланды.

2026 жылғы 1 қаңтардағы жағдай бойынша жұмыс істеу қабілетінен айырылу бойынша әлеуметтік төлемдердің орташа мөлшері 72 409 теңгені, асыраушысынан айырылу бойынша – 73 306 теңгені құрайды.

Бұған дейін премьер-министр Олжас Бектенов ауқатты қазақстандықтар әлеуметтік төлем түріндегі мемлекеттік көмекті алмауы тиіс екенін мәлімдеген болатын.

"Ақыры біз адамның қай санатқа жататынына емес, мұқтаждық қағидатына негізделген тәсілге көшіп жатырмыз. Келесі жылдың 1 қаңтарынан бастап бұл қағидат толық көлемде жұмыс істейтін болады. Мысалы, қазіргі таңда көпбалалы отбасы бай немесе кедей болғанына қарамастан, мемлекеттен бірдей қолдау шараларын алады. Біздің ойымызша, бұл әділетсіз. Ауқатты, өзін-өзі асырауға мүмкіндігі бар адамдар мемлекеттен көмек алмауы тиіс", – деді Премьер-министр.

Өзгерістер жәрдемақының қай түрлеріне қатысты болғаны және олардың табыс деңгейі мен әлеуметтік жағдайына қарай кімдерге тағайындалатыны туралы толығырақ: сілтеме бойынша оқыңыз.

Бізді Google-дың негізгі дереккөздер тізіміне қосыңыз