Қазақстанда ЖИ құралдары білім беру саласында мемлекеттік қолдау тапты

Bilim Group баспасөз қызметінің мәліметінше, жоба аясында 165 мың педагог арнайы әзірленген ChatGPT Edu жүйесіне қол жеткізе алады. Бұл бастама білім беру саласына жасанды интеллектіні енгізу бойынша мемлекеттік қолдауға ие болған ірі жобалардың бірі болып отыр.

OpenAI өкілі Кевин Миллстің айтуынша, жасанды интеллект технологиялары білім беру саласында әр адамның әлеуетін арттыруда маңызды рөл атқарады. Қазақстан мен OpenAI арасындағы серіктестік педагогтерге пайдалы құралдар ұсыну арқылы оқуға қолжетімділікті арттыруға және ЖИ дағдыларын меңгерудегі алшақтықты жоюға бағытталған. Бұл қадам білім беру жүйесінің болашағына ұзақ мерзімді ықпал етеді.

ChatGPT Edu лицензиялары мектепке дейінгі ұйымдардан бастап, мектептер, колледждер, жоғары оқу орындары, ғылыми-зерттеу институттары және Astana Hub сияқты ұйымдарға таратылады. Жоба Жасанды интеллект және цифрлық даму министрлігі, Оқу-ағарту министрлігі және Ғылым және жоғары білім министрліктерінің қатысуымен жүзеге асырылып жатыр. Лицензиялар тегін ұсынылып, оларды іске қосу BilimClass платформасы негізінде әзірленген ai.bilimclass.kz сервисі арқылы жүргізіледі.

– ChatGPT Edu – бұл тек технологиялық құрал ғана емес, сонымен бірге қазақстандық педагогтердің кәсіби дамуына бағытталған инвестиция. Жобаның мақсаты – педагогтерге жасанды интеллект мүмкіндіктерін меңгеруге және оны күнделікті жұмыста тиімді пайдалануға жағдай жасау. Бұл технология педагогтердің жұмыс жүктемесін азайтып, білім сапасын арттыруға ықпал етеді, - дейді Bilim Group IT холдингінің бас директоры Александр Савченко. 

ChatGPT Edu – білім беру мекемелеріне арналған арнайы әзірленген ChatGPT нұсқасы. Бұл жүйе оқу орындарына жасанды интеллекттің озық функцияларын пайдалануға мүмкіндік береді, сондай-ақ деректер қауіпсіздігі мен құпиялылығын қамтамасыз етеді. Педагогтер бұл құралды сабақ жоспарын құру, тапсырмалар мен тест сұрақтарын дайындау, оқу материалдарын әр оқушының деңгейіне бейімдеу үшін пайдалана алады. Жоба нәтижесінде педагогтердің сабаққа дайындалуға, тапсырмаларды тексеруге және есеп беруге кететін уақыты қысқарады. 

Еске салсақ, осыған дейін хабарлағанымзай, жасанды интеллект технологиялары мектептерді басқару тәсілдерін өзгертеді.