Қазақстаннан БӘӘ ге рейстер тағы да кейінге шегерілді

Ақтау - Дубай - Ақтау бағыты бойынша рейстерді орындау кейінге қалдырылды. Таяу Шығыстағы тұрақсыз жағдайға байланысты бұл бағыттағы әуе қатынасы 2026 жылдың 15 қыркүйегіне дейін (қоса алғанда) тоқтатылды, деп хабарлайды Tengri Travel.

Рейстер қашан қайта жанданады?

FlyArystan мәліметінше, бұған дейін рейстерді 29 тамыздан кейін қайта бастау жоспарланған болатын. Енді бұл мерзім тағы екі аптаға жуық уақытқа шегерілді.

"Әуекомпаниясы Таяу Шығыстағы тұрақсыз жағдайдың сақталуына байланысты Ақтау - Дубай - Ақтау бағыты бойынша рейстерді тоқтату мерзімі 2026 жылдың 15 қыркүйегіне дейін (қоса алғанда) ұзартылғанын хабарлайды", - делінген тасымалдаушының хабарламасында.

Бұл өңірдегі жағдайға байланысты Дубайға ұшатын рейстер кестесіндегі алғашқы өзгеріс емес. Еске сала кетейік, 12 шілдеде Таяу Шығыстағы жағдайдың ушығуына байланысты жекелеген рейстер тоқтатылып, түзетілген болатын.

Мәселен, таңғы сағат 07:10-да ұшып шыққан KC205 Астана - Дубай рейсі әуеде кері бұрылып, ұшып шыққан әуежайына қайта оралды. Сол күні сағат 08:50-де ұшуы тиіс KC897 Алматы - Дубай рейсі тоқтатылды. Ол кезде де жолаушыларға билет құнын толық қайтару ұсынылып, тасымалдаушы кестеде мүмкін болатын өзгерістер туралы ескерткен болатын.

Кейінірек компания 15 шілдеден бастап Алматы - Дубай - Алматы және Астана - Дубай - Астана бағыттары бойынша тұрақты рейстердің қайта жанданатынын жариялады. Сонымен қатар тасымалдаушы Таяу Шығыстағы жағдайдың дамуын бақылап отырғанын және қажет болған жағдайда кестені қайта түзететінін бірден мәлімдеген болатын.

Кейінірек Қазақстан мен Дубай арасындағы рейстер аймақтағы жағдайдың нашарлауына байланысты 21 шілде мен 31 тамыз аралығында тағы да тоқтатылды. Бұл ретте 21 шілдеге дейін ұшақтар жолаушыларды тасымалдап үлгеру үшін кесте бойынша ұшуды жалғастырды.

Тоқтатылған рейстердің жолаушылары билет құнын толық қайтарып ала алады. Бұл ретте қайтару үшін айыппұл ұсталмайды.

"Тоқтатылған рейстердің жолаушылары билет сатып алынған орындар бойынша ешқандай айыппұлсыз билет құнын толық қайтарып ала алады", - деп хабарлады FlyArystan.

Ақшаны қайтару үшін жолаушылар билет сатып алынған жерге хабарласуы қажет.

БАӘ-ге сапар жоспарлаған жолаушыларға рейстердің өзекті мәртебесін қадағалап отыру ұсынылады.

Google News арқылы жаңалықтарымызды қадағалаңыз