Starship V3 ұшырылымы кейінге шегерілді

SpaceX компаниясы Starship V3 зымыранының жаңа нұсқасын жоспарланған уақытта ұшыра алмады.
Әлемдегі ең қуатты зымырандардың бірі саналатын аппарат Starbase ғарыш айлағынан бейсенбі күні көкке көтерілуі тиіс болған. Алайда техникалық себептерге байланысты ұшырылым жұма күніне ауыстырылды.

Компания мәліметінше, кері санау бірнеше мәрте тоқтатылып, нәтижесінде миссияны бір тәулікке шегеру туралы шешім қабылданған. Бұл Starship жүйесінің 12-ші сынақ миссиясы болмақ.

Жаңа буындағы Starship V3 алдыңғы нұсқалармен салыстырғанда айтарлықтай жаңартылған. Зымыранның биіктігі 124 метрге жетеді. Ол жаңа буындағы V3 Raptor қозғалтқыштарымен жабдықталған. Сонымен қатар Super Heavy үдеткіші мен Ship модулі арасындағы байланыс жүйесі де жетілдірілген.

Жүк шығару жүйесіне де өзгерістер енгізілген. Бұл жолы аппарат орбитаға 20 спутник макетін және 2 нақты Starlink спутнигін шығармақ. Бұл алдыңғы сынақтармен салыстырғанда екі есе көп көрсеткіш.

Егер сынақ сәтті өтсе, Starship болашақта NASA жүзеге асырып жатқан Artemis 4 миссиясында астронавттарды Ай бетіне жеткізу үшін қолданылуы мүмкін. Аталған миссия 2028 жылдың соңына жоспарланған.

Дегенмен, Starship әлі бірқатар маңызды сынақтан өтуі қажет. Қазіргі уақытқа дейін аппарат Жер маңындағы толық орбитаға шыққан жоқ. Бұған дейінгі 11 сынақтың барлығы суборбиталық деңгейде өткен. Сонымен қатар болашақта ғарышта жанармай құю жүйесін, тіршілікті қамтамасыз ету технологияларын және экипажға арналған қауіпсіздік инфрақұрылымын толық дәлелдеуі тиіс.