Қылқан жапырақтылар Атырауды жерсіне ме?

Атырау қаласының көшелерінде шырша мен қарағай секілді қылқан жапырақты ағаштар жиі кездесетін болған. Климат ерекшеліктері мен тұзды топыраққа қарамастан, ағаштар жүздеп отырғызылуда.

Атырау қаласы әкімдігінің мәліметінше, өткен жылы Сәтпаев даңғылы бойына 146 шырша, теміржол вокзалы алдына 103 ағаш отырғызылған. Биыл қылқан жапырақтылар Жастар саябағында, Ақ шағала жағалауында, Исатай мен Махамбет алаңында, Геолог ықшамауданындағы саябақта және Әбілқайыр хан даңғылы бойында пайда болды. Күзгі көгалдандыру аясында 2,5 мыңнан астам ағаш пен бұта отырғызылған.

Әкімдік атап өткендей, жұмыстар демеуші кәсіпорындардың есебінен жүргізіліп, бюджеттік қаражат қолданылмаған. Сондай-ақ, 2025 жылғы жасыл желек отырғызу маусымын аяқтау үшін Абай атындағы орталыққа Skyrocket аршасын отырғызу жоспарланып отыр.

Ағаш көшеттері Алматы, Шымкент және Батыс Қазақстан облысындағы тәлімбақтардан жеткізілген. Оларға күтім жасау МЖӘ келісімі бойынша «Каспийдормостострой» компаниясына жүктелген.

«Ақ Жайық» тілшісі «КМДС» ЖШС директоры Леонид Задёрныймен сөйлескен еді.

– Өткен жылы отырғызылған шыршалардың жерсіну деңгейі қандай?

– Инвентаризация нәтижесі бойынша — 90–95%. Бұл Атырау климаты үшін өте жақсы көрсеткіш. Жабық тамыр жүйесі бар көшеттер, дренаж, құнарлы топырақ қоспасы және жүйелі суару қолданылды. Барлығы мамандардың ұсынысы бойынша жасалды.

– Отырғызатын орындарды кім  белгілейді?

– Тұрғын үй-коммуналдық шаруашылық бөлімі. Қала құрылысы жоспары, жер асты коммуникациялары және суару мүмкіндігі ескерілді. Біз агрономиялық кеңес беріп, учаскелерді зерттеуге қатыстық.

– Қылқан жапырақтылар топыраққа сезімтал. Атырау жағдайында қалай бейімделеді?

– Біздің топырақ — сілтілі, тұз мөлшері жоғары. Бұл қылқан жапырақтылар үшін қиын. Бірақ дұрыс топырақ қоспасы, тамшылатып суару және тұрақты тыңайтқыштар арқылы ағаштар бейімделіп, сәндік келбетін сақтайды.

Маңыздысы — күтім. Ағаштың өміршеңдігін күтім ғана қамтамасыз етеді.

– Үй ауласында шырша немесе қарағай отырғызғысы келетіндерге қандай кеңес бересіз?

– Жас ағаштар аптасына бір рет 10–15 литрден, ересек ағаштар екі аптада бір рет 30–40 литрден суарылады. Көктемде ағаштарды шайып суару, күзде 200 литрге дейін ылғалдандыру жүргізіледі. Көктемде кешенді тыңайтқыштар, жазда калий-фосфорлы тыңайтқыш, күзде калий сульфаты беріледі.

Ағаштарды жылына екі рет саңырауқұлақтар мен зиянкестерден өңдеп, топырақты қышқыл шымтезек ерітіндісімен қышқылдандырады. Көктемде санитарлық қырқу, жаз соңында пішіндік қырқу жүргізіледі.

Қылқан жапырақты ағаштарды отырғызу мен күтіп-баптауды мамандарға тапсырған жөн — сонда олар Атыраудың климатында да жерсініп, жыл бойы жайқалып тұрады.

Лев ГУЗИКОВ

Суретті түсірген автор

Бүгін, 12:23