Қытайда жастардың 17% і жұмыссыз жүр

Қытайда жұмыссыздық деңгейі төмендемей тұр, деп хабарлайды 24KZ. Әсіресе жастар екі қолға бір күрек таппайды. Елдің Ұлттық статистика бюросының мәліметіне сәйкес қазір жастардың 17%-і жұмыссыз. Әсіресе қалаларда жағдай күрделі. Еңбек нарығында бәсекелестік артқан. Қытай жастары неліктен жұмыс таппай жүр? Оған қандай факторлар әсер етті?

Жастар жұмыссыздығына әскер еткен фактор көп. Ең бірінші мәселесі білім беру жүйесінде. Кейінгі жылдары елдегі жоғары оқу орындары мен колледж бітірген түлектердің мамандығы қазіргі еңбек нарығындағы сұраныстарға сәйкес келмейді. Бұл жастарды жұмыспен қамтамасыз етуге кері әсер етіп отыр. Оған жылда жоғары оқу орындарын бітіріп жатқан миллиондаған түлек қосылады.

Кәсіпорындар мен өндіріс орындарының дені бірден тәжірибелі жұмысшы алғысы келеді. Одан бөлек ауыл-аймақтардан жұмыс іздеп қалаға көшетіндер көбейген. Биыл 10 миллионнан астам адам қалаға қоныс аударған. Бұл да бәсекелестікті арттырып отыр. Жұмыс таппай жүргендердің дені 16 мен 24 жас аралығындағы жастар. Елде еңбек нарығында пандемия кезінде бұзылған тепе-теңдік әлі күнге дейін оңалмай тұр. Кейбір мамандықтар жойылып, жұмысшылардың орнын роботтар басты. Көптеген мекемелер мен кәсіпорындарда жаппай қысқарту жүріп, мыңдаған жұмысшы күші керексіз болып қалды. Ел үкіметі бірқатар жобаларды жүзеге асырғанымен, айтарлықтай нәтиже жоқ. Қазір мемлекеттегі жалпы жұмыссыздық деңгейі төмендемей тұр.

Фу Линхуэй, ұлттық статистика бюросының ресми өкілі:

- Сыртқы экономикалық кері факторлар мен көптеген қиындықтар бар. Өткен айда қалалардағы жұмыссыздық деңгейі 5,1%-ке жетті. Дей тұра Қытайда жұмыссыздық мәселесін шешу бағытында кешенді шаралар қабылданып жатыр. Жыл басынан бері 10,5 миллион жаңа жұмыс орны ашылды. Осының арқасында 31 ірі қаладағы жұмыссыздық 0,1% азайып отыр.

Миллиардтан астам халқы бар алпауыт ел үшін бұл мардымсыз көрсеткіш. Жалпы Қытай Халық Республикасы болып құрылғалы бері жұмыссыздық деңгейі үш рет шарықтау шығына жеткен. Бірінші 1973 пен 1979 жылдары. Ол кезде бір мезетте 15 миллион халық ауылдан қалаға жаппай көшкен. Оған демобилизацияланған 20 миллионға жуық әскери қосылып, елде жұмыссыздық орын алды. Екінші толқын 1998 бен 2001 жылдары тіркелді. Мемлекеттік кәсіпорындарды реформалау жаппай кезінде болды. Осы кезеңдегі тоқырау кезінде 26 миллион адам қысқарып кетті. Бұл мемлекеттік кәсіпорындарда еңбек ететін жұмысшылардың төрттен бір бөлігі еді. Үшіншісі пандемия кезінде тіркелді. Жалпы Қытай Халық Республикасының тарихында әрбір 20 жылда жұмыссыздыққа қатысты тоқырау болып отырған.

Сарапшылар: «жыл соңына қарай елдегі жұмыссыздық төмендейді», – деп болжап отыр. Оған үкімет тарапынан қабылданған кешенді шаралар әсер етеді деп есептейді. Сонымен қатар қытай халқының қартайып бара жатқанымен байланыстырылады. Жүргізілген әлеуметтік талдауға сәйкес биыл Қытайда жұмыссыз жүрген халық санына қарағанда зейнетке шығатындар көп екен.   Яғни жұмыс орындары босайды деген болжам бар.

Авторлары: Руслан Бақытбекұлы, Мадияр Ерсайын