Қызылорда облысы Бесарық ауылындағы тұрмыс қаладағыдан кем емес

Қызылорда облысында мемлекеттік бағдарлама арқылы ауылдардың инфрақұрылымдық жүйелері жаңартылып, емханалар және білім ошақтары салынып жатыр.

Шағын елді мекендер ажарланып, тіршіліктің тынысы кеңейе түскен. Оң өзгерістердің айқын көрінісін Бесарық ауылынан байқауға болады.

Екі жарым мыңнан аса тұрғыны бар Бесарық ауылындағы тұрмыс қаладағыдан еш кем емес. Себебі көшелерге тақтайдай тегіс жол салынып, жарық шамдар орнатылған. Шағын саябақтары да бар. Елді мекендегі ілкімді істер мемлекеттік реформа нәтижесі.

Дәулет Сәрсенбаев, Бесарық ауылының әкімі:

- Төртінші деңгейлі бюджетті өзімізге берді. Ауылды абаттандыру көгалдандыру, тазалық, дегендерге жұмсап отырмыз. Бізге бергені өте қолайлы болды. Қолымыз аузымызға жеткендей. Өзіміз еркін. Алатын ауылға керек жарақты өзіміз алатын болдық. 

Бесарық - аймақтағы ең үлгілі елді мекендердің бірі. Ауылда қылмыс, жұмыссыздық деген атымен жоқ. Келіспеушіліктің бәрі ақсақалдардың келелі кеңесінде шешіледі. Әкімнің жұмысын да тұрғындар бағалайды.

Ақпар Ақжігітов, ауылдық ақсақалдар кеңесінің мүшесі:

- Ауылдың әкімін өзіміз екінші мерзімге сайладық. Халықтың басым көпшілік басымен дауыс алды. Елдің ішкі сыртқы жағдайынан хабардар. Елде болып жатқан жағдайды, ақсақалдар кеңесімен, аналар кеңесімен ақылдасып бірлесіп шешіп отырады. 

Елді мекенде шағын өндірісті дамыту үшін былтыр «Ауыл аманаты» бағдарламасымен өндірістік алаң ашылды. Сол арқылы оннан аса жергілікті тұрғын өз кәсібін өркендетуге мүмкіндік алды. 

Мөлдір Бақтыбаева, Бесарық ауылының тұрғыны:

- Өзіміздің шағын цехымыз ашылды. Жартылай, полуфабрикат. Ешқандай аренда ештеңе төлемейміз. Бізге үлкен көмек. 

Келер жылы әкімшілік аумақтарға қатысты жаңа бюджеттік кодекс күшіне енеді. Соған байланысты салықтың бір бөлігі ауылдық әкімдіктің есеп-шотына аударылады. Қаражат қоры - жергілікті әкімдерге өзекті мәселелерді дер кезінде шешуге мүмкіндік береді.

Шыңғыс Қалиден, Райхан Тажибаева, Акан Алиев