Қызылорда облысында Таза Қазақстан акциясына 540 мың адам қатысты

Биыл «Таза Қазақстан» акциясына 540 мың қызылордалық қатысты. Олардың күшімен 20 мың тоннадан астам қоқыс шығарылып, 250 мың ағаш егілді.

Осындай жұмыс Шиелі ауданында атқарылды. Серуендейтін орындар көбейіп, аудан орталығы абаттандырылды. Игі бастамаға үлес қосқан жандардың еңбегі ескерусіз қалған жоқ. 

60 жастағы Ыбырайхан Зілтаев аудандық тазалық мекемесінде еңбек етеді. Жұмыстың жаманы жоқ. Ең бастысы – адал табыс. Оның үстіне туған жерімнің көркеюіне үлес қосып келемін, - дейді.

Ыбырайхан Зілтаев, Тазалық мекемесінің жұмысшысы:

-Үйде тазалық болғаннан кейін сыртта да тазалық бірдей. Сол себепті тазалықты ұстайық. Туған жеріміз таза. Сосын тазалық әке-шешеге байланысты. Балаларға үйретіп, өнегелі болып, айтып отырса жақсы.

Шиеліде «Таза Қазақстан» акциясы аясында түрлі экологиялық іс-шара ұйымдастыру дәстүрге айналған. Аудан еріктілері мен белсенді жастар тазалық жұмыстарынан қалыс қалған емес. Бұл жолы олар коммуналдық мекеме қызметкерлеріне ыстық шәй мен дәм ұсынды.

Ержан Әбдешев, Шиелі аудандық Жастар ресурстық орталығының директоры:

- Күні кеше жалғызбасты қарттардың үйіне барып, аулаларына тазалық жұмыстары жүргізіліп, бүгін коммуналдық қызметте жүрген аға-апаларымызға жастардың атынан ыстық шәй мен тәттілер сыйлыққа берілді. Алдағы уақытта балаларды қуанту, соғыс және тыл ардагерлерінің үйіне сыйлықтар таратты. Тағы басқа күнделікті он күндік акциясы жүргізіліп отырады.

Қоршаған ортаның тазалығына атсалысқан жандардың еңбегі ескерусіз қалмады. Салтанатты шарада Ыбырайхан Зілтаев сияқты тазалық жұмыстарына үлес қосқан жандар марапатталды. Оларға қаржылай сертификат пен шипажайға жолдама тапсырылды.

Айтбай Жандарбеков, Шиелі ауданының әкімі:

- Үлкен аллеялар салынды. Денсаулық аллаясын салдық. Бұл жұмыстарды да жергілікті бюджеттің есебінен салынып жатыр. Сонымен қатар «Туған жерге тағзым» акциясы аясында ойын алаңдары, спорт алаңдарын салып беріп жатыр. Сонымен қоса кенттің орталығындағы көпқабатты тұрғын үйлердің әрлеу жұмыстарын жүргізіп жатырмыз.

«Таза Қазақстан» республикалық экологиялық бағдарламасы аясында  облыс бойынша 540 мың адам мен 500-ден астам техника жұмылдырылды.

Авторлары: Нұрлан Жақыпбеков, Ақан Әлиев