Қызылордада жаңа сот төрағалары мен судьялар қызметке кірісті

Президент Жарлығымен Қызылорда облыстық сотының азаматтық істер жөніндегі сот алқасының төрағасы болып Жасұлан Жақсылық тағайындалды.

- Қызылорда облыстық сотының судьялары болып Гүлнара Тиыштықбаева, Салтанат Абызбаева, Нұрлан Еламанов тағайындалды. Сырдария аудандық сотының төрағасы болып Қайратбек Бержанов, Байқоңыр қалалық сотының судьясы болып Азамат Қазкенов тағайындалды. Шара барысында жаңадан тағайындалған Байқоңыр қалалық сотының судьясы А.Қазкенов Қазақстан Республикасы судьяларының антын қабылдады, - делінген хабарламада.

Жасұлан Берікұлы 2009-2015 жылдары Жамбыл облысы Талас аудандық сотының судьясы, 2015-2020 жылдары Атырау қаласының мамандандырылған әкімшілік сотының төрағасы, 2020 жылдан бастап қазіргі уақытқа дейін Атырау қалалық сотының төрағасы қызметін атқарған.

Гүлнара Зұлғарақызы сот жүйесінде 1994 жылдан бастап қызмет атқарып келеді. 2014-2020 жылдары Қазалы аудандық сотының судьясы, 2020 жылдан бастап қазіргі уақытқа дейін Қызылорда қалалық сотының судьясы қызметін атқарған.

Салтанат Бектайқызы 2014-2020 жылдары Ақтөбе қалалық сотының судьясы, 2020-2023 жылдары Астана қаласы Алматы аудандық сотының судьясы болды. 2023 жылдан бастап қазіргі уақытқа дейін Астана қаласының азаматтық істер жөніндегі ауданаралық сотының судьясы қызметін атқарып келді.

Нұрлан Бекмырзаұлы 2007-2011 жылдары прокуратура органдарында, 2014 жылдан бастап қазіргі уақытқа дейін Қызылорда облысының мамандандырылған ауданаралық экономикалық сотының судьясы қызметін атқарған.

Қайратбек Маханбетұлы сот жүйесінде 2001 жылдан бастап қызмет атқарып келеді. 2014-2023 жылдары Қызылорда облысының кәмелетке толмағандардың істері жөніндегі мамандандырылған ауданаралық сотының судьясы, 2023 жылдан бастап қазіргі уақытқа дейін Қызылорда облысының мамандандырылған ауданаралық экономикалық сотының судьясы болған.

Азамат Әбілханұлы сот жүйесінде еңбек жолын 2008 жылдан бастаған. Жетекші маман, бас маман, кеңсе меңгерушісі, бөлім басшысы қызметтерін атқарған. 2023-2024 жылдары Шымкент гарнизоны әскери соты әкімшісін басқарды.

Бұған дейін Қызылорда облысы бойынша сот әкімшілігі департаментінің жаңа басшысы болып Мөлдір Асанова тағайындалған болатын.