Сәтбаев көшесіндегі таңбалауға қатысты түсініспеушілік Алматыда уәде етілген мерзімнен кейін не өзгерді

Алматы әкімдігі Сәтбаев көшесіндегі жүргізушілерді шатастырған ескі жол белгілерін 9 тамызға дейін толық өшіруге уәде берген болатын. Бұл жұмысқа шетелдік мамандарды тарту жоспарланды. Tengri Auto тілшісі аталған жерге барып, жағдайды тексеріп қайтты.

Сәтбаев көшесіндегі жол белгілері

Сәтбаев көшесі мен Назарбаев даңғылының қиылысындағы қозғалыс схемасы өзгергеннен кейін ескі белгілердің бір бөлігі сақталып қалған. Соның салдарынан кейбір учаскелерде ескі және жаңа сызықтар қатар көрініп тұр, бұл жүргізушілердің айтуынша, жолда бағдарлануды қиындатады.

30 шілдеде бұл мәселеге Алматы мәслихатының депутаты Ольга Спирина назар аударған еді. Оның айтуынша, мұндай таңбалар жүргізушілерді жол қозғалысы ережелерін бұзуға мәжбүрлейді және апатты жағдайларға әкеп соғуы мүмкін.

Сол кезде жол қозғалысын ұйымдастыру және жолаушылар көлігі басқармасының басшысы Ержан Диханбаев ескі таңбаларды механикалық жолмен өшіруге тырысқандарын, бірақ одан нәтиже шықпағанын айтқан болатын.

Осыдан кейін басқарма бояуды жоғары қысымды сумен жуып кетіретін Беларусь елінен арнайы техника алдыруды ұйғарды.

Диханбаев ескі таңбаларды 9 тамызға дейін толық тазартуға уәде берген еді.

10 тамызда Tengrinews.kz тілшісі Сәтбаев көшесінің Алматы әкімдігі ғимаратының алдындағы жаңартылған аумаққа таяу тұсында болды.

Сәтбаев көшесіндегі жол белгілері / 10 тамыз / Фото Tengrinews.kz / Ақбота Сіләм

Сәтбаев көшесіндегі жол белгілері / 11 шілде / Фото Tengrinews.kz / Марат Әлжанов

Біз бұл жерде соңғы рет осыдан бір айға жуық уақыт бұрын – 11 шілдеде болғанбыз. Кейбір учаскелерде әлі де ескі таңбалардың элементтері, сондай-ақ асфальтты механикалық тазалаудың іздері байқалады.

Сәтбаев көшесіндегі жол белгілері / 10 тамыз / Фото Tengrinews.kz / Ақбота Сіләм

Сәтбаев көшесіндегі жол белгілері / 10 тамыз / Фото Tengrinews.kz / Ақбота Сіләм

Жол қозғалысын ұйымдастыру және жолаушылар көлігі басқармасы мердігердің жұмысты аяқтап, ескі таңбаларды өшіргенін хабарлады.

"Бүгінгі таңда Сәтбаев көшесіндегі (Желтоқсан көшесі мен Назарбаев даңғылының аралығындағы) ескі жол белгілері демонтаждалды, содан кейін бұл учаскеде жол қозғалысын ұйымдастырудың бекітілген схемасына сәйкес тиісті таңбалар сызылды", – деп хабарлады басқарма.

Сондай-ақ ведомство мердігер жұмыстарды бюджеттен қосымша қаражат шығындамай, өз есебінен жүргізгенін нақтылады.

Еске сала кетейік, Алматыда Сәтбаев көшесінің Луганскийден Байзақовқа дейінгі 3,7 шақырымы абаттандырылып жатыр. Жоба аясында Республика алаңының маңындағы аумақ жаңартылды.

Назарбаев даңғылымен қиылысында қозғалыс схемасы өзгерді. Енді Желтоқсан көшесі бағытына қарай жүретін жүргізушілер алдын ала тиісті жолаққа ауысуы керек. Бұл ретте автомобильдер үшін алты жолақ (әр бағытта үш-үштен) сақталды.

Сондай-ақ реконструкциядан кейін мұнда екі жаңа бағдаршам мен реттелетін жаяу жүргіншілер өткелдері пайда болып, Республика алаңының алдындағы тұрақ алынып тасталды.

Google News арқылы жаңалықтарымызды қадағалаңыз