Шексіз скроллинг жастарды аз уақытта тәуелді жасайды, миын өзгертеді

BGR сайтының материалына сүйенген Aikyn.kz скроллингтен қалай сақтануға болатынын түсіндіреді.

Шексіз скроллинг жастарды аз уақытта тәуелді жасайды, миын өзгертеді. Фото gazeta.ru сайтынан алынды. Авторлығы: Brendan McDermid/Reuters

Соңғы уақытта ChatGPT сияқты жасанды интеллект адамдарды «ақымақ жасайды» деген пікірлер жиі айтылып жүр. Бірақ біздің назарымызды бөлетін, уақытымызды алатын тек жасанды интеллект қана емес. Шексіз скроллинг – бүгінде қалыпты әдетке айналған. Жастар TikTok, Instagram Reels және YouTube Shorts платформаларында минуттап емес, сағаттап отырып, қысқа видеолардың тоқтаусыз ағынында өздерін жоғалтып алуда. Бұл дабыл қағатын мәселе.

Енді YouTube те қолданушылардың қысқа видеоларға тым көп уақыт жұмсайтынына тыйым салғысы келеді. Бұл, бәлкім, компания айтып жүрген ата-ана бақылауын енгізу әрекеттерімен байланысты болуы мүмкін.

Сайтта «Шектеулі қол жеткізу» (Restricted Mode) режимі бұрыннан бар. Бірақ бұл тек алғашқы қадам. Қолданушылардың қысқа видеолар көруге кетіретін уақытын азайту үшін YouTube енді мобильді құрылғыда Shorts лентасын айналдыру ұзақтығын шектейтін жаңа таймер енгізуді жоспарлап отыр.

Компанияның хабарламасында былай делінген: «Қолданушылар «Параметрлер» бөлімінен Shorts лентасын айналдырудың күнделікті уақыт шегін орната алады немесе өзгерте алады. Белгіленген уақыт аяқталған кезде, оларға Shorts лентасын айналдыру сол күнге тоқтатылғаны туралы хабарлама беріледі».

YouTube сіздің уақытыңызды басқаруға қалай көмектеседі?

YouTube уақытты басқаруға көмектесетін функцияны бірінші рет енгізіп жатқан жоқ. Қазіргі таңда қосымшада қолданушы өзі орната алатын «Үзіліс жасау туралы еске салу» және «Ұйықтайтын уақытты еске салу» функциялары бар. Сондай-ақ скроллингті шектейтін түрлі бөгде қосымшалар да кездеседі. Бірақ YouTube-тің өзіне кіріктірілген қысқа видеолар таймері бұл мүмкіндікті одан да қолжетімді етеді.

Бұл жүйенің нақты қалай жұмыс істейтіні әлі белгісіз. Алайда оның уақытты басқару бойынша басқа параметрлермен бірге жұмыс істейтіні анық. Егер YouTube қосымшасын ашып, «Сіз» (You) қойындысына кірсеңіз және жоғарғы оң жақтағы тісті дөңгелек белгісін бассаңыз, баптаулар мәзірі ашылады. Сол жерден «Негізгі» (General) бөлімін таңдағанда, ең үстінде екі тетікшені көресіз: «Үзіліс жасау туралы еске салу»; «Ұйықтайтын уақытты еске салу».

YouTube-те қанша уақытыңызды өткізетініңізді білгіңіз келсе, мұны да мобильді қолданба арқылы оңай көруге болады. «Сіз» қойындысын төмен сырғытып, «Қарау уақыты» (Time watched) бөлімін бассаңыз, соңғы 7 күнде YouTube қарауға кеткен уақытыңыздың графигі ашылады. Бұның бәрі сіздің уақытыңызды дұрыс жоспарлап, пайдалы істерге уақыт бөлуіңізге көмектеседі.

Сараптама, зерттеу мақала, күнделікті өзекті ақпаратты «Айқынның» TELEGRAM арнасынан табасыз.