ШҚО да 13 жолдың құрылыс жобасы іске асты

Шығыс Қазақстан облысында 2025 жылы республикалық жолдарды жаңғыртуға 100 миллиард теңгеге жуық қаржы бөлінді.

13 жоба іске асырылды. Әсіресе жергілгікті жұрт ондаған жыл бойы асыға күткен бағыттарда құрылыс аяқталды. Десе де, жөндеу жұмыстары жылдан жылға созылып жатқан жол бөліктері бар. Мысалы, Өскемен-Алтай тас жолы бойында тау арасында салынып жатқан көпір тағы аяқсыз қалды. 

2025 жылы Шығыс Қазақстанда жол құрылысы саласында ілкімді іс атқарылды. Тұрғындар көптен күткен ірі екі нысан қолданысқа берілді. Алматы - Өскемен бағыты және Омбы - Майқапшағай халықаралық тас жолы салынды. Бұл жол транзиттік әлеуетке тікелей әсер етеді. Майқапшағай және Үлбі өткізу бақылау пунктері де толық жаңартылды. Логистка серпін алды. Демалыс орындарына апаратын жолдар да ұмыт қалмады.

Эльмира Ахметова, тілші:

- Қатон-Қарағайдағы Рахман бұлақтарының басына апаратын жол жайы талай жылдан бері туристерді әбден әуреге салып келді. Қандай көлікпен барсаңыз да тозығы шыққан 13 шақырым жолды еңсеру оңай болмады. Ал такси ақысы 40-80 мың теңгеге дейін жетті. Ақыры көп күткен жол бөлігін жөндеу басталды.

Марқакөлдің басына апаратын күре жол да кезең-кезеңімен жаңартылып жатыр. Қалжыр - Марқакөл бағытындағы 24 шақырым жөнделді. Бұл  тасжолдың жаңғыртылуы маңызды, дейді мамандар. Себебі Омбы-Майқапшағай дәлізінің бір бөлігі. Жалпы өңірде 357 шақырым республикалық жол орташа жөндеуден өтті.

Саяхат Мүсәпіров, "Жол активтері сапасының ұлттық орталығы" ОФ бөлім басшысы:

- Жұмыстарды жүргізу барысында  біздің тарапымыздан да  сараптама жүргізілді, 500-ден аса тексеру жүргізілді. 450-ге жуық ақаулар мен сәйкессіздік анықталды, қазіргі  таңда олар толық жойылып, пайдалануға берілді.

Өңірде жылдан жылға созылып, аяқталмай жатқан учаскелер де бар. Руслан Наурызов Өскемен мен Алтай ауданы арасында азық-түлік тасымалдайды. Тереңсай асуындағы шатқалды бойлаған ирелең жолмен аптасына бірнеше рет өтеді.

Руслан Наурызов, көлік жүргізушісі:

- Бұрын жол жаман болған Василевкамен екі ортада мысалы жарты сағат жүретінбіз, 40 минут  қазір іселді бәрі жақсы енді кейбір жерлепрі бар дұрыс істелмеген, соны қадағаласа.

Тау арасындағы серпантинді айналып өту мақсатында жүргізіліп жатқан құрылыс өткел салуға келгенде тұрып қалды. Себебі геологиялық есептеулерден қате кеткен. Әрі жер бедері де қиындық тудырды.

Әділет Жампейісов, "Қазавтожол" ҰК ОФ директорының орынбасары:

- Қалада салынған көпір мен тау ішінде салынған көпірдің айырмашылығы өте көп. Ол жерге барудың өзі қиын, бетон апару, техниканы жеткізу. Олардың тұруы оның бәрі техникалық қауіпсіздікті талап етеді.

Енді бұл күрделі учаске 2026 жылы аяқталады. Осылайша Өскемен -Үлкен Нарын – Қатон-Қарағай бағытындағы туристік нысандарға апаратын жол қысқарады.

Эльмира Ахметова, Жігер Бабаханов