Шымкентте жеделсатылар жаңартылады

Шымкентте «Тұрғын үй-коммуналдық инфрақұрылымын дамыту тұжырымдамасы» аясында  27 ескі лифт жаңасына ауыстырылып жатыр.  

Жалпы біраз көпқабатты үйдегі жеделсатылардың техникалық жағдайы мәз емес. Жиі істен шығады. Мұны тексеріс жүргізген жауапты мекеме мамандары анықтады.

Нәтижесінде пайдалану мерзімі өткен жеделсатыларды кезең-кезеңмен ауыстыру үшін мемлекеттік бағдарлама арқылы тиімді шарт ұсынды. Бірінші кезекте апатты жағдайда тұрғандары ауыстырылады. 

Жеделсатылардың техникалық жағдайын көріп шыққан мамандар біраз құрылғыны жаңғырту  керек деп отыр. Тұрғындардың шағымы ескеріліп, апатты лифтілер бірінші кезекте тексерілді. Жалпы қаладағы көп қабатты тұрғын үйлер, медицина, білім беру және сауда орындарында 1000-нан астам лифт бар. «Тұрғын үй-коммуналдық инфрақұрылымын дамыту тұжырымдамасымен 27 жеделсаты жаңасына ауыстырылып жатыр.

Мәлік Иманбердиев, мердігер компания басшысы:

- Тек лифттің қаңқасы ғана емес толық ауыстырылады. Ол жерде есік ауысады, жүру жолдары ауысады, кабина ауысады, матор, станция барлық деталі ауысады. АРД деген свет өшіп қалған жағдайда автоматты түрде өзі қосылып, керек қабатқа адам қамалып қалмас үшін керек этажға түсіріп есікті ашады. 

Яғни жаңа жеделсатыда адамдардың қауіпсіздігі ақылды жүйе арқылы қамтамасыз етіледі. Лифт жарық өшкен жағдайда да тоқтап қалмайды. Ескі құрылғының жаңаратынын естіген тұрғындар қуанып жүр. 

Айжан Есебаева, қала тұрғыны: 

- Күнде істен шығатын. Қорқатынбыз, ішінде тұрып қалатынбыз. Механиктер шақырамыз келіп жөндейді. Бірақ артынан қайтадан бұзылып, сынып қалатын. 

Әлия Ережепова, қала тұрғыны:

- Қазір қуаныштымыз жаңа лифт орнатып жатқанына. Енді сол тез іске қосылса деген ойдамыз. 

Тұрғын үй қорын жаңғырту жұмыстары пәтер иелерінің өтініші бойынша немесе жеделсатының пайдалану мерзімі аяқталған жағдайда жүзеге асады. Биыл осы мақсатта қосымша тағы 10 лифтті ауыстыру жоспарланып, жергілікті бюджеттен 200 миллион теңгеден астам қаржы бөлінді. 

Мерлан Керімжанов, қалалық орта сапасы және бақылау басқармасының басшысы:

- Лифтіні ауыстырған қаражатты нақтылап мемлекет тарапынан мердігерге беріледі. 7 жылдан 15 жылға дейін ешқандай пайызсыз сол қаражат тұрғындарға бөлінетін болады. 

Жеделсатыларға шамадан тыс жүктеме түссе, тез бұзылады, дейді жауаптылар. Тұрғындардың ортақ мүлікке немқұрайлы қарауы да негізгі мәселе. Әдейілеп қиратып кететіндер бар. Осыған орай, мамандар үгіт-насихат жұмыстарын  жүргізіп жатыр.

Нұрсұлтан Мұхамеджан, Нұрмахан Мұсатов, Нұрмахан Бекмұратов