Silk Way Star еуропалық сарапшыларды жоғары кәсібилігімен таңғалдырды

Silk Way Star байқауы аймақтан тыс жерлерде де көрермен назарына ілікті. Еуропалық сарапшылар жобаның дайындық сапасы мен мәдени маңызын жоғары бағалап жатыр, деп хабарлайды Egemen.kz.

Бельгиялық дизайнер Елена Ван Харитонова шоудың форматы ауқымы мен көрсетілімі бойынша еуропалық сахналарды еске түсіретінін атап өтті.

– Мен 12 елден келген қатысушылардың өнері мен образын, жүргізушілердің образын қазылар алқасының образын түгел қарап шықтым. Қызықты сәттер өте көп. Жас қатысушылардың этнодинамиканы, заманауи хип-хоп пен классикалық мотивтерді өз образдарында, сахналық костюмдерінде қалай үйлестіре алғанын байқадым, – деді ол.

Оның айтуынша, шоудың кейбір элементтері «Евровидение» атмосферасын еске түсіреді.

– Мен сондай-ақ Орталық Азия мен бүкіл Жібек жолында әйгілі болған алтын кесте үлгісін көріп тұрмын. Мәселен, жүргізушілер сондай костюм үлгісін таңдаған. Түстер мен жарықтандыру да өте әсерлі, – деген баға берді дизайнер.

Сарапшы қатысушылардың таланты мен күш-жігерін жоғары бағалап, оларды «өз елдерінің жарқын және шынайы өкілдері» екенін айтты.