Smart военкомат : Әскерге барардағы қағазбастылық азайды

Кеше Астана қалалық жинақтау пунктінде Қорғаныс министрлігі «Smart военкомат» цифрлық жобасының артықшылықтарын таныстырды. Баспасөз конференциясында Қорғаныс министрінің цифрландыру жөніндегі орынбасары Дархан Ахмедиев енді жастарды әскери есепке алу және әскерге шақыру жүйесінің оңтайландырылғанын жеткізді, – деп хабарлайды Aikyn.kz. 

– Азаматтың әскерге шақырылуы 17 жастан басталады. Алдыңғы жылдан бастап біз бұл «приписканы» проактивті түрге ауыстырдық. Яғни, азаматтар тіркеуге  автоматты түрде алынады. Ал оған тиісті хабарлама SMS-пен және еGov порталындағы жеке кабинет арқылы жолданады. Мекенжайды ауыстырса да оның қайда ауысқаны көрініп тұрады. Тіпті, олар жұмысқа тұрарда кадр бөлімшелері военкоматтан анықтама алып, тапсырудың да керегі жоқ. Осының бәрін біздің ақпараттық жүйемізден, яғни е-Enbek немесе е-Qyzmet ақпараттық жүйелеріннен көре алады, – деді  Қорғаныс министрінің цифрландыру жөніндегі орынбасары Дархан Ахмедиев.

Барлық дерек мемлекеттік базалармен біріктіріліп, енді әскерге шақыру науқаны мейлінше ашық болмақ. Әскерге барарда тапсыратын медициналық тексеруі оңтайландырылып, қағазбастылықтан арылтқан. Мәселен, «е-Медосмотр» жүйесінен әр азаматтың әскерге баруға қажетті анализі, дәрігердің қойған диагнозы, оның жарамды не жарамсыздығын көруге болады.  Яғни, «е-Медосмотр» жүйесі шақырылушылардың цифрлық медициналық картасын қалыптастырып, одан 100-ден астам медициналық параметр бойынша деректі алуына мүмкіндік береді.

Ұйымдастыру-жұмылдыру жұмыстары департаменті бастығының орынбасары, полковник Арман Сариннің айтуынша,  «Smart военкомат» жобасының бүгінгі жетістігі бірнеше жылдық жұмыстың нәтижесі.  Оның үстіне, «е-Медосмотр» жүйесін тестілеуі Астана, Шымкент қалаларында және Қарағанды облысындағы Абай қаласында сәтті өткен.

Бұйрық расталған сәтте ақпарат бірден Мемлекеттік кредиттік бюроға жөнелтіледі. Дәл сол күні кредиттік жеңілдік автоматты түрде іске қосылады. 

– Бұйрық шыққан күні-ақ банктер мен микроқаржы ұйымдарына азаматтың әскери қызметке кеткені туралы хабарлама түседі. Заң бойынша олар мұндай азаматтарға 14 айлық кредиттік каникул беруге міндетті. Яғни, төлемдер бір күннің ішінде автоматты түрде тоқтатылады, – деді Ахмедиев.

Жалпы, республика бойынша 700 мыңнан астам шақырылушы есепте тұр. Биыл әскерге алынған 40 мыңға жуық азаматтың 20 мыңында әртүрлі несиесі бар.  Жалпы дерек бойынша, бүгінге дейін әскерге аттанғандардың несиесі, оның ішінде тауарлық және микрозаймдарды қосқанда, барлығы 9 миллиард теңгеге жетеді.