Таразда жұмысшы мамандардың чемпионаты өтті

Таразда өңірдің үздік токарь және дәнекерлеуші маманы анықталды, деп хабарлайды 24KZ. «TemirSkills-2025» облыстық чемпионатына аймақтағы колледждердің 1-2 курс студенттері қатысты. Болашақ шеберлер темір бөлшектерді дәнекерлеп, жонғыш станоктарда жұмысын көрсетті.

Жамбыл облысының ашық чемпионатына өңірдегі 10 колледж қатысты. Сайысқа тәжірибе алмасу үшін Қырғызстаннан да қатысушылар келді. Жас дәнекерлеушілер мен токарьлардың арасында бұрымдылар да бар. Ер балалармен қатар сайысқа түскен қыздардың бірі – Виктория Киселёва. Оның әкесі мен ағасы дәнекерлерлеу ісімен бұрыннан айналысады. Сондықтан бала кезінен қызығып, осы мамандықты таңдағанын айтады.

Виктория Киселёва, жарысқа қатысушы:

- Осы мамандықты таңдағанда анам мен әкем бірден қолдады. Ағам да өз ақылын берді. Алғашқыда аспаз мамандығын таңдап, оқып көрдім. Бірақ бәрібір іштей дәнекерлеу ісіне тартып тұрды. Сондықтан осында ауыстым. Басында кішігірім заттарды дәнекерлеп үйрендім. Қазір орындық, үстел секілді дүниелерді еркін дәнекерлей аламын.

Өңірлік біріншілікке алыс ауданнан келген ауыл балалары да қатысып отыр.

Бақдәулет Совет, жарысқа қатысушы:

- Өзімнің атам ағаштан бұйымдар жасайтын, содан дарыған болу керек. Бұл дәнекерлеу ісі өзіме ұнайды. Қолымнан келгені осы. Болашақта осы оқуды бітіріп, өзім үлкен цех ашып, дамыта берсем деймін.

Жарыс 4,5 сағатқа созылды. Қатысушыларға бірдей тапсырма беріліп, қазылар алқасы бағалады. Коммисия дәлдік пен жұмыстың тазалығына, қауіпсіздік талаптарына баса мән берді.

Жеңіс Тайбеков, колледж директорының орынбасары:

- Екі кезеңде де өздерінің белгілі бір жұмыстары орындалады. Критерийлері ұсынылған. Сол критерий бойынша орындайды. Басқа республикадан келген кісілермен тәжірибе алмасу жұмыстары ұйымдастырылып жатыр. Жұмысшы мамандықтарына қызығушылықты арттыру, имиджін арттыру мақсатында ашылып жатқан өтіп жатқан іс-шара. Биыл бұл бірінші рет болғандықтан, ендігі жылы жалғасады деген ойлаймыз.

Жарыс нәтижесі бойынша дәнекерлеу мен токарлық істе 6 студент үздік атанды. Олардың қатарында Виктория Киселёва да бар. Жалпы аймақтағы колледждерде жұмысшы мамандықтары бойынша 12 мың студент тегін білім алып жатыр.

Авторлары: Мерей Бает, Тимур Сейілхан