Таяу Шығыстағы жағдай ушығып барады: Иран халқында дүрбелең басталды

28 ақпан күні Таяу Шығыстағы жағдай күрт шиеленісті. Израиль Иранға соққы жасағанын ресми түрде мәлімдеді. Осыдан кейін Иран астанасы Тегеранда жарылыстар естіліп, қала тұрғындары арасында дүрбелең басталды, деп хабарлайды Arasha.kz.

Reuters агенттігінің хабарлауынша, Иранның Жоғарғы көшбасшысы Әли Хаменеи Тегеранда емес. Ол қауіпсіз жерге көшірілген. Бұл ақпаратты агенттікке ресми өкіл растаған. Алайда оның нақты қайда екені жарияланған жоқ.

Израильдің мәлімдемесі

Израиль қорғаныс министрі Исраэль Кац ел әскері Иранға «алдын ала соққы» жасағанын айтты. Оның сөзінше, бұл қадам Израильге төнуі мүмкін қауіптердің алдын алу мақсатында жүзеге асырылған.

Израиль армиясы (ЦАХАЛ) бүкіл ел аумағында төтенше жағдай жарияланғанын хабарлады. Ел тұрғындарына бомба паналарына жақын болу ескертілді. Сонымен қатар:

білім беру мекемелерінің жұмысы тоқтатылды;

жиналыстар мен кеңсе жұмысына шектеу қойылды;

азаматтарға қажетсіз сапарлардан бас тарту ұсынылды.

Әскерилер дабылдың негізгі мақсаты – халықты ықтимал зымыран шабуылына дайын ету екенін атап өтті.

Тегеранда жарылыстар

Ирандық ақпарат құралдарының мәліметінше, Израиль зымырандары Тегерандағы Данешгах даңғылы мен Джомхури ауданында жарылған. Сондай-ақ Пастур ауданында қою түтін көтерілгені айтылды. Қала орталығында бірнеше жарылыс дауысы естіліп, тұрғындар қауіпсіз орындарға қарай жаппай қозғалған.

Қазіргі уақытта Иран билігі ресми мәлімдеме жасаған жоқ. Зардап шеккендер туралы нақты дерек те жарияланбады.

Аймақтағы ахуал

Бұл оқиға Израиль мен Иран арасындағы ұзақ уақыттан бері жалғасып келе жатқан шиеленісті жаңа деңгейге шығаруы мүмкін. Сарапшылардың пікірінше, тараптардың әскери қақтығысы кең ауқымды аймақтық жанжалға ұласу қаупін күшейтеді.

Халықаралық қауымдастық жағдайды жіті бақылауда ұстап отыр. Ал Таяу Шығыстағы ахуалдың қалай өрбитіні алдағы сағаттарда белгілі болуы мүмкін.