Тең түскен тартыс

Өз алаңымызда Бельгия құрамасымен тереземіз тең түсіп, топтық кезеңді 8 ұпаймен жаптық. «Соңғы түйенің жүгі ауыр» демекші, футболшыларымыз бұл ойында жан беріп, жан алысты деуге болады. 

«Астана Арена» 28 мың жан­күйерге лық толып, нағыз футбол фес­тиваліне айналды. Ойынды Литвадан келген бас төреші Донатас Румшас бастаған қазылар алқасы басқарды.

Бельгияның ұлттық құрамасы әлемдегі үздік құрамалардың бірі екеніне сөз жоқ. «Манчестер сити», «Арсенал», «Астон Вилла» сынды мықты клубтардың жұлдызын жандырып жүрген Леандро Троссард, Жереми Доку, Амаду Онана сияқты ойыншылар үрейімізді ұшырғаны рас. Бельгия құрамасымен біз J тобында күш сынастық. Бельгия бізбен тең түскенімен, әлі де тур­нирлік кестеде бірінші орнын сақтап қалды. Келесі ойыны кестенің соңында тұрған Лихтенштейн құрамасымен болмақ.

Бұған дейін Ұлттық құрама сырт алаңда Бельгиядан 6:0 есебімен ойсырай жеңілген еді. Жалпы, екі құрама қазірге дейін 7 мәрте кезде­сіп, оның екеуінде тең нәтиже тір­келсе, қалғанында отандастары­мыз қарсыласына есе жіберген. Қазақстан ұлттық құрамасының бас бапкерінің міндетін атқарушы Талғат Байсуфинов баспасөз мәслихатында: «қарсылас өте мықты, бірақ матчқа нағыз бабында тұрған спортшыларымызды шығарамыз, өз ойнымызды көрсетеміз», – деді.

Бірінші тайм бастала салысы­мен «қызыл перілер» допты өз бақы­лауында ұстап шабуылға дайын екенін көрсетті. Алайда жігіттеріміз қателікке бой алдырған бельгиялық футболшылардан допты лезде қағып алып, қарсы шабуылға шығып отырды. Ә дегеннен матчтың 9 минутында Дастан Сәтпаев қарсыластың қателігін пайдаланып, құйындай жүгере қарсыластың қақпасына допты дәл тигізді. Бұл Дастанның құрама сапында соққан алғашқы голы еді. Дәл осы кезде стадион «Оооо, Дастан Сәтпаев!» деп шырқата жөнелді.

Үзіліске дейін қос тарап та бірқатар қауіпті сәттерді ұйымдас­тырды. Есепті теңестіруге асық бол­ған бельгиялықтар Темірлан Анарбековті әбден қыспаққа алып, қақпаны торуылдап жүріп алды.

Екінші таймның басында Ханс Ванакен жақын қашықтықтан баспен дәл соққы жасап, есепті теңестірді. Одан кейін бельгиялықтар бірнеше қауіпті шабуыл ұйымдас­тырғанымен есепті еселей алмады. 79 минутта Ислам Чесноков Джере­ми Докуға аяғы тиіп кетіп, «қызыл қағаз» алып, алаң иелері азайып қалды. Соған қарамастан, Қазақстан қорғанысты ұстап, фаворитке қарсы тең нәтижені жұлып алды.

Футбол сарапшысы Есет Төлештің сөзінше, Ұлттық құрама бұл ойынмен мақтануы керек.

– Әрине, біз күтпеген нәтиже. Біздің құрама өз тарихында алғаш рет ФИФА рейтингінде топ-10 тізіміне енетін коман­дадан ұпай алып отыр. Қорғаныс арқылы ойнайтынымыз белгілі болған, бірақ қарымта шабуылдар қауіпті көрінді. Ойынды өзіне ала алатын жас буын өскені қуантады. Бұл Қазақстан құрамасы­ның мен көрген ең үздік бірінші таймы болды. Әдетте, ойынға бірден еніп кетуіміз қиын еді, бұл жолы ойын бастала сала шабуыл­ жаса­ғаны ұнады.

Сонымен бірге, бапкерлердің тактикалық шешімдері де ойынды өзгертуге үлес қосты. Жас ойыншы­ларға сенім арту, кейбір тәжірибелі футболшылардың рөлін тиімді пай­да­лану команданың жаңа дең­гейге көтерілгенін көрсетеді. Осылайша, команда тек қорғаныста емес, шабуылда да өз мүмкіндігін толық көрсете алды, – деді Есет Төлеш.

Жақсы қақпашы – жарты команда

Ойындағы қаһармандардың бірі Темірлан Анарбеков жайында айтпай кету әбестік болар еді. Ойын барысында 8 сейв жасап, өз қақпасына шаң жуытпады. Барша футболсүйер қауым Темірланның қайтарған доптарынан ләззат алып, керемет ойын өрнегінің куәсі болды. Тіпті, азулы қарсыласымыз матчтан соң Темірлан Анарбековке мақтау айтып, өнерін жоғары бағалады.

– Менің ойымша, Темірлан Анарбеков қазір Қазақстан ұлттық құрамасының нөмірі бірінші қақпашысы екенін дәлелдеп отыр. Ол өз деңгейін бұрын-ақ көрсетіп үл­герді. «Селтик», «Пафос», «Аста­на», «Интер», енді Бельгия құрамасы. Бәрі де мақтауға лайық болды. Расы­мен, өніп-өсемін десе, шетелдік клубқа ауысқаны жөн болар еді. Еуропаға кету үшін тәжірибе толыс­қаны қажет емес, сол жақта-ақ жи­найды. 

Біздің көршілер мен жақын елдер мысалы да дәлел: украиналық голкиперлер Андрей Лунин мен Анатолий Трубин жастайынан Еуропаға аттанды, ал көршіміз Өзбекстанның қорғаушысы Абдуходир Хусанов 21 жасында «Манчестер Сити» сапында өнер көрсетіп жүр. Сол себепті дәл қазір бабында тұрған шағында мүмкіндікті жіберіп алмау керек, – спорт коментаторы Дидар Есемов.

Бас бапкер ауыса ма?

Бапкер Талғат Маруаұлының тағдыры осы ойыннан кейін шешілуі әбден мүмкін болған. «Егер өткен турдағыдай жігіттер келісті ойын көрсетіп жатса, келісімшарт мерзімі ұзарады» деп жатты сарапшылар. Иә, Талғат Байсуфинов тізгінді қол­ға ұстағаннан бері Ұлттық құ­рама­мыз әлі жеңілістің дәмін татқан жоқ. Тіпті, «құраманы әуелден жат­тық­тыру керек еді» деп жатқан­дардың қарасы аз емес.

– Әрине, қазір Талғат Байсу­финовті ертерек қою керек еді деп айту оңай. Бірақ биыл жыл басында бұл жайында ешкім де ойламаған. Себебі ол бапкерліктен біраз алыстап қалған еді. Ал қазанда басқа бапкерлердің бос емесіне байла­нысты шақырту алды ғой. Құрамаға осыдан екі жыл бұрынғы атмосфера қайта келгендей. Расымен, таза қазақтілді, рухы бар команда қайта жиналғандай көрінеді. Үш матчта бес ұпай жинағаннан кейін ол қызметінде қалуы керек. Келесі циклді өз қолына ала алады деп ойлаймын, – деді Есет Төлеш.

Қазақстан құрамасының бас бапкерінің міндетін атқарушы Тал­ғат Байсуфинов Бельгиямен өткен матчты қорытындылады. Оның ай­туынша, біздің жігіттер сәтті ойын көрсетті.

– Цикл аяқталды. Тең түстік, бір ұпай алдық. Осы нәтижеге кө­ңіліміз толады. Өздеріңіз көрдіңіздер, ойын қандай болды. Бельгияға әлем чемпионатына шығу қажет. Сол се­бепті олар бізге үлкен қысым жа­сады. Жігіттерге алғыс айтамын. Соңына дейін шыдады, – дейді бас бапкер. 

Байсуфинов екінші таймда Ислам Чесноковтың алаңнан қуылған сәтіне де пікір білдіріп:

– Бұл эпизодты тағы да қарай­мыз. Біздің ойыншыға қарсы да ереже бұзылды. Бірақ төреші осын­дай шешім қабылдады. Македонияға қарсы матчта екі ұпай жоғалтқаны­мызға өкіндік. Бүгін осы нәтижеге лайық болдық деп ойлаймын. Біз чемпионатты аяқтаған әрі әлі ба­бын­да жүрген ойыншыларды са­­лыс­­тыра отырып шешім қабылда­дық, – деді.

Сондай-ақ бас бапкер көптің көкейінде жүрген сұраққа қызметінде қала ма, әлде жоқ па деген сұраққа жауап берді. 

– Мен қазақпын ғой. Ал Ұлттық құраманың аты – Ұлттық құрама. Менің қалғым келеді, бірақ алдымен Фарер аралдарымен ойнайық. Содан кейін басшылықпен бірге шешім қабылдаймыз. Көмегім қажет болса, әрдайым қолұшын созамын, – деп қорытындылады сөзін бас бапкер.

Әсет ҚАЛИ