Almaty Open: тартыс қыза түсті

Бұл – ТМД бойынша ATP 250 деңгейіндегі жалғыз турнир. Биыл аталған спорттық іс-шара екінші мәрте Алматыда ұйымдастырылып отыр. Әлемдік деңгейдегі бәсекеде теннис кортына шығып, ел намысын қорғаған спортшылардың қатарында Александр Шевченко, Бейбіт Жұқаев, Әмір Омарханов, Денис Евсеев, Тимофей Скатов және Михаил Кукушкин бар. 

2020 жылдан бері елімізде дәс­түрлі түрде өткізіліп келе жатқан бұл турнир әлемнің озық спорт­шыларын бір алаңға тоғыстыру­мен ерекшеленеді. Мәселен, биылғы жарыста бақ сынайтын­дардың тізімінде дүниежүзілік рейтингте үздік отыздыққа кіретін ракеткалар да бар. Додаға әлемнің 10-ракеткасы, өткен жылғы тур­нир­дің чемпионы Карен Хачанов, Даниил Медведев (18-ракетка), Флавио Коболли (25-ракетка), Лучано Дардери (30-ракетка) және т.б спортшылар бой көрсетті.

Жарыс жолын жеңіспен бас­таған қазақстандық теннисші, әлемнің 91-ракеткасы Александр Шевченко алғашқы кездесуін сербиялық Ласло Джеремен өт­кіз­ді. Қарсылас спортшы қазір жаһандық тізімде 79-орында тұр. Алайда екі сағат алты минутқа созыл­ған тартысты ойын отанда­сы­мыздың пайдасына шешілді. Алайда Шевченко турнирдің екін­­ші айналымында франциялық Корентен Мутеге есе жіберіп, жар­ыс­ты аяқтады.

Осыған дейін Александр Шев­ченко ATP деңгейінде 45-орынға дейін көтерілгені есімізде. Спорт­шы турнир алдындағы баспасөз мәслихатында берген сұхбатында алда бұл көрсеткіштен де жоғары нәтижеге қол жеткізуге күш са­лат­­ынын жеткізді. 

– Біріншіден, теннисте сәт­ті­ліктің де орны бар. Әсіресе, өзіңе ыңғайлы жабындыда өтетін тур­нир­лерге қатыссаң, жеребең жеңіл түссе, қолайлы қарсыластар болса, демек көбірек ұпай жинауға мүмкіндік бар. Шынымды айтсам, үздік елу спортшының тізімінде тұр­ған кезең мен қазіргі ойын­ымды салыстырсам, айтарлық­тай үлкен айырмашылық көріп тұр­ған жоқпын. Мүмкін тәжіри­бем аз бол­ған шығар, бірақ әр доп үшін басымды тігіп, бар күшіммен ойнайтынмын. Мен өзімді үздік отыздыққа, тіпті жиырмалыққа ене алатын ойыншы деп санай­мын. Сол мақсатқа жету үшін еңбек ете беремін, – деді ол.

Спортшы Шанхайда өткен ойыннан кейінгі ұлттық құрама­ның көңіл күйі, командадағы ат­мосфера туралы да пікірін бөлісті. 

– Иә, шынын айтқанда, жеңіліс көңілге қатты тиді. Сол үшін жанкүйерлерден шын жү­рек­тен кешірім сұраймыз. Бірақ біз міндетті түрде бұл жағдайдан шығуға тырысамыз. Біздің құра­ма­ның әлеуеті қазіргі деңгейде тоқтап қалмауға тиіс. Сондықтан бәрін түзету үшін жұмыс істейміз. Жалпы, көңіл күй қалыпты, бірақ әрине, жеңілістен кейін бәрінің де еңсесі түсті. Себебі команда­дағы әрбір ойыншы жеңіске жету үшін барын салды, – деді А.Шевченко.

Биылғы қатысушылардың ара­сында әлемдік тізімдегі пози­циясымен оқ бойы озық тұрған спортшы – Карен Хачанов. Спорт­шы өз сөзінде Қазақстанға қайта оралғанына қуанышты екен­ін айтып, жанкүйерлерін сәтті ойынымен қайта қуантқысы келетінін жеткізді. Спортшы осы жолы да өткен жылғы жеңісін қай­та­лауға ниетті еді. 

– Қазір турнирді Алматыға көшіру арқылы теннис ойынын елдің әр өңіріне таратуға тырысып жатыр. Бұл өте дұрыс шешім деп ойлаймын. Былтыр ширек финал­дан кейін стадион лық толы бол­ды. Ең маңыздысы да сол, көрер­мен қызығушылығының жоғары болуы. Теннисте күтпеген жағдай­лар жиі кездеседі. Алматыдағы тур­нирде ойнау – мен үшін өте маң­ызды. Бұл – бойымдағы сен­ім­ділікті қайта қалпына келтіру мүм­кіндігі деп білемін. Себебі осыған дейін мұнда сәтті ойын көрсеткенмін. Ең бастысы – қол­ың­дағы бар мүмкіндікті уақы­тыл­ы пайдалану. Қалғаны өз нәтижесін береді, – деді теннисші.

Алайда Хачанов жарыстың екінші айналымында әлемнің 98-ракеткасы, германиялық Ян-Леннард Штруфқа жол беріп, екінші мәрте чемпион атану бұйыр­мады. 

– Мен бұл жолы қарсыла­сым­нан не күту керегін жақсы түсін­дім. Мұндай сәттерде бәрі өз ойын­ыңа, тактикаңа байланысты. Қарсыла­сымның ойыны туралы айтсақ, ол кейбір сәттерде менен қарағанда сәттірек ойнады. Матч тартысты әрі ауыр өтті. 2019 жылы Парижде дәл осындай жағдайда одан ұтылып қалғанмын. Сол кез­де қарсыласым үшінші сетте 7:5 есе­бімен басым түскен еді, – деді ол.

Атап өтерлік жайт, Алматы­дағы жарысқа дейін спортшы Шан­хайдағы теннис турнирінде күш сынап, маңызды кездесулер өткізген еді. Қаланың ылғалды ауа райын ескерсек, бұл кейбір спорт­шылар үшін қиындық тудырған. Осыған байланысты спортшы Қа­зақстанда өтетін ойын алдын­дағы акклиматизация проце­сі туралы айтып берді. Хачановтың сөзінше, ол Қазақстанға сапары алдында отбасымен демалып үлгерген. 

– Мен Шанхайдан кейін Алма­тыға бірден ұшып келген жоқпын. Жарыс аяқталған соң Мәскеуге қарай жол тарттым. Отбасым мен балаларымды көріп, бірнеше күн сонда демалдым. Содан кейін аздап жаттығумен айналыстым. Жарыстың алғашқы күндері – ауа райына бейімделіп, турнирдің ырғағына ену үшін өте маңызды кезең. Иә, маусым ұзақ, турнир көп. Қазір соңғы 3–4 тур­нирге күш жинау маңызды. Мау­сым соңында кім сергек әрі жина­қы болса, сол спортшының ар­тық­шылығы көп болады, – деді К.Хачанов.

Бүгін теннис жанкүйерлері жартылай финал кезеңінің тар­тыс­ты ойындарына куә болады. Ал күні ертең шешуші матчта үздіктер жеңіс тұғырынан көріну үшін сынға түспек.

Алтынай БАУЫРЖАНҚЫЗЫ,

Алматы қаласы