Тендерде жеңіске жеткеннен кейін тексерістер басталды Жолаушылар тасымалы жағдайды түсіндірді

Әлеуметтік желіде кәсіпкер Нұрсұлтан Мұсаманқұловтың видеосы тарады. Онда ол өз компаниясының "Жолаушылар тасымалы" АҚ-мен жұмысы төңірегіндегі жағдайды айтады. Оның сөзінше, тендерде жеңіске жеткеннен кейін компания тұрақты тексерістер мен жұмыстағы қиындықтарға тап болған. Ал "Жолаушылар тасымалы" АҚ тексерістер бірінің нәтижесі бойынша анықталған заңбұзушылықтар туралы мәлімдеді, деп хабарлайды Tengri Travel.

Неден басталды?

Нұрсұлтан Мұсаманқұлов жарияланған роликтердің бірінде өзінің "SAN10" ЖШС компаниясы "Жолаушылар тасымалы" АҚ тендерін жеңіп алғанын айтты. Оның сөзінше, бұл бюджетті 24 миллион теңгеге үнемдеуге мүмкіндік берген.

Сонымен қатар кәсіпкер бұдан кейін тасымалдаушы басшылығы компания жұмысына кедергі келтіре бастағанын мәлімдеді.

"Қазіргі басшылық бізге қысым көрсетіп отыр: күн сайын комиссия шақыртып, жұмыс істеуге мұрша бермейді. Олардың жалғыз мақсаты - осы жылдар бойы төсек-орын жуып, жұмсақ керек-жарақтармен қамтамасыз етіп келген компанияның мүддесін қолдау. Олардың бағасы ең жоғары және бұрын-соңды бәсекелестері болмаған. Ал енді біз пайда болғанда, олар бізді ысырып тастап, келісімшартты тартып алғысы келеді", - деді Нұрсұлтан.

Instagram-дағы бұл жазбаны көру

A post shared by Zeit (@kaltefruling)

Мұсаманқұлов Қарағанды учаскесіндегі жағдайға да тоқталды. Оның айтуынша, компания пойызды рейстерге дайындап қойған, енді жұмыс барысын видеоға түсірмекші.

"Қазір біз бұл пойызды толық жабдықтадық. Мен барлық материалды жариялап, жағдайдың қалай өрбитінін көрсетіп отырамын. Олардың бізден келісімшартты тартып алуының жалғыз жолы - жұмысты бұзу. Қарағанды қала маңы тасымалы учаскесінің бастығы Н.Г. есімді азаматша. Меніңше, кедергі келтіретін жалғыз адам сол болады, өйткені бұл құрам соның учаскесіне тиесілі", - деп атап өтті ол.

Жарияланған келесі роликте Мұсаманқұлов жолаушылар пойызын көрсетті. Кадрлардан жыртылған перделер мен басқа да кемшіліктерді көруге болады. Сондай-ақ ол пойыз құрамы көмірмен жылытылатынын айтты.

Кәсіпкердің пікірінше, тасымалдаушы оның компаниясының жұмысын тексермес бұрын, пойыздардың жай-күйіне де назар аударуы керек.

Instagram-дағы бұл жазбаны көру

A post shared by Zeit (@kaltefruling)

Ролик астындағы пікірлерде "Жолаушылар тасымалы" АҚ баспасөз қызметі "SAN10" ЖШС өкілі айтқан ақпарат шындыққа жанаспайтынын хабарлады.

"Әлеуметтік желілерде "SAN10" ЖШС өкілінің жолаушылар пойыздарын төсек-орын жабдықтарымен қамтамасыз ету жұмысы белгіленген талаптарға сәйкес орындалып жатқаны туралы бейнеүндеуі таралып жатыр. "Жолаушылар тасымалы" АҚ ұсынылған ақпарат нақты жағдайға сәйкес келмейтінін мәлімдейді", - деді тасымалдаушы өкілдері.

Тасымалдаушының мәліметінше, тексеріс барысында мердігердің өз міндеттемелерін орындауында заңбұзушылықтар анықталған.

"Қоғамның жұмыс тобы Қарағанды станциясында жүргізген тексеріс барысында кірлеген және зақымдалған төсек-орын жабдықтары, дақтары бар төсек жаймалары, сондай-ақ таңбалау биркаларын кесіп алып, ауыстыру фактілері анықталды. Төсек-орын жабдықтарын пайдалану белгіленген мерзімінен асып кеткен жағдайлар да құжатпен расталды", - деп хабарлады компания.

Скриншот: Instagram

Компания өкілдері 2 қыркүйектен бастап анықталған фактілер бойынша қызметтік тергеу жүріп жатқанын атап өтті.

"Анықталған фактілер бойынша биыл 2 қыркүйектен бастап қызметтік тергеу жүргізіліп жатыр. Қызмет көрсетушінің іс-әрекетіне тиісті баға беріліп, оның қорытындысы бойынша заңнамаға сәйкес шаралар қабылданады", - деп бөлісті компания өкілдері.

"Жолаушылар тасымалы" АҚ жағдайды қарау үшін уәкілетті органдарға тексеріс материалдарын ұсынуға дайын екенін атап өтті.

Айта кетейік, жақында қазақстандық теміржолда тағы бір оқиға болған еді. Саяхатшы Лара Зёльднер Бейнеу кентінен бір аптаға жуық уақыт бойы кете алмай қалған. Оның пойызға велосипедпен міну әрекеті жанжалға ұласып, Instagram-да жариялаған видеосы 5,3 миллионнан астам қаралым жинаған.

Тағы оқыңыз: Қостанай тұрғыны Алматыға баратын пойызға екі рет итімен кіре алмаған

Бізді Google-дың негізгі дереккөздер тізіміне қосыңыз