ТМД елдері заңсыз қаржы айналымына қарсы халықаралық орталық құрды

Жоғарғы палата Мәжіліс қабылдаған «Қылмыстық жолмен алынған кірістерді заңдастыру (жылыстату) және терроризмді қаржыландыру қауіп-қатеріне баға беретін халықаралық орталықты құру туралы келісімді ратификациялау туралы» заңды мақұлдады.

Қаржы және бюджет комитетінің төрағасы Сұлтанбек Мәкежанов бұл келісімге ТМД мемлекет басшылары 2023 жылдың қазан айында Бішкек қаласында қол қойғанын атап өтті. Аталған орталық ТМД елдерінің ұлттық экономикалары мен қаржы жүйелерін, қылмыстық кірістерді жылыстату және терроризмді қаржыландыру қатерлерінен қорғауға бағытталған және сын-қатерлерді бағалаумен айналысады.

– Бұл Халықаралық орталық қорғалған ақпараттық жүйе ретінде жұмыс істеп, ТМД елдерінің қаржылық барлау бөлімшелері арасында тиімді мемлекетаралық өзара іс-қимылды, ортақ ақпараттық ресурстарды қалыптастыруды және тәуекелдердің ұлттықтан жоғары деңгейде бағалануын қамтамасыз етеді. Оған қоса, қаражаттың транзиттік қозғалысын, активтердің түпкілікті орналастырылуын, сондай-ақ салықтық қылмыстар мен сыбайлас жемқорлық бойынша мәліметтер алмасуды қоса алғанда, трансшекаралық қылмыстық топтардың қызметін талдайды, – деді С.Мәкежанов Сенат отырысындағы баяндамасында.

Халықаралық орталық ұлттық және халықаралық деңгейде қылмыстық жолмен алынған кірістерді заңдастыру және терроризмді қаржыландырумен байланысты тәуекелдерді бағалайды. ТМД елдері арасындағы жедел ақпарат алмасуды қамтамасыз етеді.

Сонымен бірге, кірістерді заңдастыру мен терроризмді қаржыландыруды алдын алу, онымен күресу үшін халықаралық стандарттар мен ұсынымдарды алдын ала әзірлеп, енгізеді.

Орталық қаржы мониторингі және тәуекелдерді бағалау саласындағы мамандарды оқытады, олардың біліктілігін арттырады және қаржы институттары, құқық қорғау органдары және басқа да мүдделі тараптар арасындағы ынтымақтастықты нығайтады.

– Бүгінде дүние жүзінде жасанды интелекттің ерекше дамуына байланысты бұл халықаралық орталықтың құрылуы өте маңызды. Себебі орталық қаржылық ақпаратты жан-жақты зерделейтін заманауи ақпараттық-талдау жүйесі ретінде ұйымдастырылған. ТМД Атқарушы комитетінің хабарлауынша, орталықтың талдау жүргізуге арналған тиісті технологиялық платформасы қазірдің өзінде жоба ретінде іске қосылып, өз жұмысының тиімділігін іс жүзінде көрсетіп тұр, – деді Сенат депутаты.

Келісімді Армения, Беларусь, Қырғыстан, Ресей, Тәжікстан және Өзбекстан мемлекеттері өз парламенттері арқылы ратификациялаған.

Бұған дейін Сенат депутаттары Жоғарғы соттың үш судьясын қызметінен босатты.