ТМД елдерінің алыс берісі 110 млрд долларға жетті

Қазақстан Халықаралық құқықтың іргесі сөгіле бастағанын және Біріккен Ұлттар Ұйымының бітімгерлік әлеуеті әлсірегенін алаңдаушылықпен қабылдайды. 

Президент ТМД мемлекеттері басшылары кеңесінің отырысында осылай деп, бірлестікке мүше елдерді қақтығыс факторларын жою үшін күш біріктіруге шақырды. Қасым-Жомарт Тоқаевтың пікірінше, ТМД жаңа тарихи жағдайда мемлекеттер арасындағы сенімді арттырудың халықаралық тетігі ретінде сұранысқа ие құрылым екенін дәлелдеді. Осы ретте, Президент бірқатар ұсынысымен бөлісті. Сауда-экономикалық байланыстарды жандандыру негізгі басымдықтардың бірі болып қалуға тиіс екенін айтып, сала серпілісіне тың мүмкіндіктерді қарастыруды ұсынды.

Қасым-Жомарт Тоқаев, ҚР Президенті:

- Өткен жылдың қорытындысы бойынша ТМД елдері сауда айналымының жалпы көлемі сегіз пайыз ұлғайып, 110 млрд долларға жетті. Сонымен қатар соңғы бес жылда Қазақстанның Достастық мемлекеттерімен алыс-берісі бір жарым есе өсіп, 38 млрд долларды құрады. Бұл көрсеткіш Ұйымның сауда-экономикалық әлеуетін танытады және әлі де мүмкіндіктердің бар екенін байқатады. Сауда-экономикалық ынтымақтастықты одан әрі арттыруға қажетті институттық және құқықтық базамыз бар.