Тоқтатайық... : Бақыт Сәрсекбаев өзі туралы қауесетке нүкте қойды

Қазақстан жастар құрамасының бас бапкері Бақыт Сәрсекбаев әлеуметтік желіде мәлімдеме жасады, – деп хабарлайды Aikyn.kz.

Ол өзін құттықтап жатқан жандарға алғыс білдіріп, артылған сенімді ақтауға бар күшін салатынын жеткізді. Сонымен қатар өзіне қатысты тараған қауесетке нүкте қойды.

«Ассалаумағалейкум, ағайын! Құттықтап жатқан баршаңызға рақмет! Артқан сенімдеріңізді ақтауға тырысамын. Іссапарда жүрсем, журналисттер хабарласып, маза бермейді, анау сіз туралы үй дейді, мынау бүй дейді, соған не айтасыз деп. Енді әркімнің өз аузы бар, өз ойын айтуға құқығы бар, мен барлық адамға ұнай беретін күміс теңге емеспін ғой, деп айтып шаршадым. Ағайын, көп өтірік өсек, қаңқу сөздердің тарауына жол бермейік. Мойнына үлкен жауапкершілік артылған Нұржан бауырымыздың көңілін түсіріп, аяғынан шала бермей, қолдау білдірейік. Қайрат ағамызға мықты денсаулық тілейік», - дейді Бақыт Сәрсекбаев.

Ол жастар құрамасымен нәтижелі жұмыс істегіcі келетінін, қызметке қатысты басқа жоспары жоқ екенін айтты. Сонымен қатар федерациядағы ауыс-түйіске қатысты пікір білдірді.

«Ойбай не дейсің, енді Насановты Сарсекбаев ауыстырады екен деген сыбыстарға нүкте қояйын бүгін. Бас бапкерді ауыстыру ойыншық емес, өте стратегиялық маңызды қадам. Өткен жыл қазақ боксы үшін жеңіл болған жоқ, Қайрекеңнің денсаулығы сыр бергені рас болмаса, нәтиже көрсеткен бапкерді алып тастап, Азия ойындары алдында басқа бапкер қоя салатын федерация басшыларының да басы екеу емес қой. Енді Олимпиадаға екі жыл қалғанда ешкім де ауыс- түйіс жасамайды. Мен Насановтың орнына көз тігіп тұрғаным жоқ, өзіме сенім артылған жастар құрамасымен нәтижелі жұмыс істегім келеді. Қазақ боксының қай жерінде жүрсем де, ризамын, бокс менің өмірім, қазақ боксына қызмет етсем болды! Нұржан Насанов өте білікті маман, қүрамада жүргеніне біраз болды, әрбір боксшыны жақсы таниды, әлі талай нәтиже көрсететініне сенемін, сәттілік тілеймін! Ендігі жерде бокс басында жүрген азаматтарды бір- біріне қарсы қоюды тоқтатайық, өтініш!» - деп жазды ол.

Сараптама, зерттеу мақала, күнделікті өзекті ақпаратты «Айқынның»  TELEGRAM  арнасынан табасыз.